Menge Ininang 16:14-40

¹⁴Doen sebad bayi si Lydia nenenalan kenami. Tiyatira se tinebolan din. Egpemeligyà sikandin te penenaktun melalag kidoen te Filipos. Gayed sikandin egtolò te ibeg te Timanem. Pegpenenalan i Lydia te intoladà day, migtabang se Pengolo kandin amon memenal ki Jesus.

¹⁵Binonyagan sikandin sipat kedita te otaw mig-ogpà diyà kandin. Penga niyan, minikagi sikandin, “Aw nemenal kaw te nelobos se pedowan ko diyà te Pengolo, peg-ogpà kaw den doton te balay ko.” Ontò migpeido-ido si Lydia aw yan timandù kay.

¹⁶Nayan, doen sebad aldaw migpesalo kay doton te wayeg amon megtawal-tawal. Kinità day se sebad allang bayi enitowan. Sikandin se teleetok aw eden se domateng diyà te otaw. Yan dakel se ontong te menge tig-apò din pineokit te peg-etok din.

¹⁷Timelokon se bayi kenami aw timawal, kagi din, “Sikandan se sogounun te Timanem Melangkaw. Dimini dan amon megtoladà dan kenyo te doen kelowaan lekat te salà.”

¹⁸Yan se eg-inangen din te kelikit te aldaw. Sagwa wedà peketayod si Pablo, yan siminalo kandin aw minikagi diyà te bosaw, “Insogò a i Jesu Cristo, aw yan mikagi a kamno, lowà ka diyà kandin.” Pegketà limowà se bosaw diyà kandin.

¹⁹Pegketaga-taga te menge tig-apò te pigbàtan den se ebetanan dan te kwarta, inewidan dan si Pablo aw si Silas. Inibing dan doton te oseyanan kidoen te poblasyon.

²⁰Inibing dan doton te dowa howis aw minikagi dan, “Migsamok dan dini kenitadon. Sikandan se Judiyo,

²¹aw doen intoladà dan eked tadon kepakay toloen, so sakop te Roma se kedita tadon eg-ogpà dini.”

²²Yan ontò neopal se kedita dan ki Pablo aw si Silas. Linisì te howis se saol i Pablo aw si Silas amon bedasen dan.

²³Penga dan binadas, kineleboso dan. Migpunù se howis diyà te otaw egtonggò te ontò din imendayan amon eked dan pekelowà.

²⁴Timolò sikandin aw insawol din dan doton te tambì didalem te keleboso. Impeawop se benis dan diyà te awang te kayo amon eked dan pekekadas.

²⁵Tengà te delem, migtawal-tawal si Pablo aw si Silas diyà te Timanem. Migdelangan dan heman se dimuyun te Timanem. Nenenalan kandan se menge doma otaw kineleboso.

²⁶Pegketà miglinog ontò magsen, aw ontò nekayong se keleboso. Neowang se kedita te tetakep niyan, aw nelebad se sengkalì in-iket te menge otaw kineleboso.

²⁷Pegkeloka te otaw egtonggò, kinità din se tetakep neowang, aw tinagnos din se kempilan amon megpeumul-umul, so eden din aw nekelowà den se menge otaw kineleboso.

²⁸Meneng timawal si Pablo te dakel se kagi din, “Ikà egpeumul-umul, so seini pa se kedita day.”

²⁹Penga niyan, impeangay te otaw egtonggò se solò, aw ayas minawop. Limongken sikandin diyà ki Pablo aw si Silas, aw tinegangtang tandà te lamit din.

³⁰Inibing din dan doton te lowà aw mig-insà, kagi din, “Eden lay se inangen ko amon mekelowà a lekat te salà ko?”

³¹Timaba dan, “Pemenal ka te Pengolo si Jesus amon mekelowà ka lekat te salà, sikona aw menge doma otaw eg-ogpà diyà te balay nikaw.”

³²Penga niyan, migtoladà si Pablo te kagi te Pengolo diyà kandan aw kedita te otaw eg-ogpà diyà te balay din.

³³Tengà pa te delem, inonawan din se palì dan. Binonyagan dan sikandin aw kedita te otaw mig-ogpà diyà kandin.

³⁴Inibing din dan doton te balay din, aw pinekaen din dan. Neluba se kedita dan, so nemenal den dan te Timanem.

³⁵Pegkealdaw, insogò te howis se menge sondalo doton te otaw egtonggò aw minikagi dan, “Pelowai dan.”

³⁶Penga niyan, minikagi se otaw egtonggò ki Pablo, “Doen insogò te howis amon ipelowà kaw. Mepakay kaw den lomowà. Ibeg ko doen kelinaw te pedowan niyo.”

³⁷Meneng wedà tandù si Pablo. Minikagi sikandin diyà te sondalo, “Pengkey sakop kay te Roma, meneng binadas kay dan diyà te keditaan te otaw. Penga niyan, kineleboso kay, pengkey wedad salà day. Aw ibeg dan pa, ieles se pegpekesayo kenami. Meneng eked kay kesayo singed aw sikandan se domini amon megpelowà kenami.”

³⁸Penga niyan, kineliwat te sondalo se inikagi dan doton te dowa howis. Pegketaga-taga te howis te sakop dan te Roma, ontò dan nelemitan.

³⁹Yan dimoton dan te keleboso amon ipelowà dan. Migpeido-ido dan ki Pablo aw si Silas, aw pigbalaw-balaw dan te mesayo dan lekat te Filipos.

⁴⁰Pegkelowà dan, dimoton dan te balay i Lydia. Yan migkità dan te menge otaw egpemenal, aw inantag dan se pedowan dan amon melobos se pedowan dan diyà te Timanem. Penga niyan, nesayo dan lekat te Filipos.