Menge Ininang 15:10-40

¹⁰Meopal besi se Timanem aw ipetolò niyo dan te ontò melima, so wedà iyan kebatog te kemonaan tadon, aw eked kidon heman pekebatog kenyan.

¹¹Meneng netegahan tadon den te nekelowà kidon lekat te salà pineokit te tabang i Jesu Cristo kenitadon. Onawa heman se pegpelowà din te menge doma otaw, pengkey kenà dan Judiyo.”

¹²Penga niyan, netingen se kedita te otaw aw nenenalan dan. Mig-indan si Bernabe aw si Pablo te menge kepelahan ininang te Timanem pineokit kandan doton te menge otaw kenà Judiyo.

¹³Pegkepenga niyan, minikagi si Santiago, “Menge kedowa ko, penenalan kaw kanak.

¹⁴Mig-indan den si Simon te doen den heman menge otaw kenà Judiyo pinemallì te Timanem amon makop dan heman diyà kandin.

¹⁵Onawa heman se kagi te Timanem insolat te telekeliwat te kagi din,

¹⁶‘Penga niyan, lomikò a. Pengkey simagked se peglowan te bowad-bowad i David, meneng todà ko ipedeleg se peglowan dan

¹⁷amon tomaking te Pengolo se kedita te otaw tinawal ko pengkey kenà dan Judiyo.

¹⁸Yan se kagi te Pengolo impetaga-taga din gebii.’

¹⁹“Nayan, aneng-aneng ko, eked kidon pegleges te menge otaw kenà Judiyo egpemenal te keilangan tolien dan.

²⁰Meneng mèpiya aw olò kidon somolat kandan aw megpunù kidon te eked dan kaen te pengelapen tapay imbegay diyà te inotaw, aw ayam-ayam egpelengen aw dipanog, aw eked dan heman peg-inabut te kenà kandan esawa.

²¹Mèpiya aw tomolò dan kenyan, so lekat te gebii doen gayed egtoladà te punù ingkeliwat i Moises te kelikit te Sebado doton te simbahan te Judiyo kidoen te teg sebad-sebad lonsod.”

²²Penga niyan, migsebad se aneng-aneng te kedita te otaw egpemenal sipat menge sogounun i Cristo aw menge egpengibing te simbahan. Pinemallì dan se dowa otaw tomaking ki Pablo aw si Bernabe domoton te Antyokya. Se pinemallì dan, yan si Silas aw si Judas, se doma ngadan din si Barsabas, so induyun dan te kedita te otaw egpemenal.

²³Seini se kagi te solat impeibing kandan. “Menge kedowa day kenà Judiyo doton te Antyokya, aw Sirya, aw Silisya. Se simolat kani, yan se menge sogounun i Cristo aw egpengibing te simbahan. Sikami se kedowa niyo.

²⁴Doen ekon menge otaw lekat dini migsamok kenyo pineokit te pegtoladà dan. Migbulung dan ekon te pedowan niyo. Meneng wedà kay sogò kandan doton kenyo.

²⁵Migsebad den se aneng-aneng day te isogò day se otaw domoton kenyo, aw tomaking dan te kedowa tadon si Bernabe aw si Pablo egkedekelan tadon te pedowan.

²⁶Se didowa dan gayed egsalig te Pengolo tadon si Jesu Cristo.

²⁷Se pinemallì day isogò doton kenyo, yan si Judas aw si Silas. Sobloden dan se kagi insolat day doton kenyo.

²⁸Inelladan kay te Espiritu Santo, aw yan migsebad kay te eked kay pegleges te pegtolò niyo te kedita te ketanem day, meneng seini olò se ipunù day kenyo.

²⁹Ikà niyo egpengaen te pengelapen tapay imbegay diyà te inotaw, aw dipanog, aw ayam-ayam pelengen. Ikà niyo heman eg-inabut te kenà kenyo esawa. Mèpiya aw tomolò kaw kenyan. Taman den iyan te ikegiyen day kenyo.”

³⁰Penga niyan, nesayo se insogò dan pesalo doton te Antyokya. Pegdateng dan doton te Antyokya, pigtipon dan se kedita te otaw egpemenal. Imbegay dan se solat diyà kandan.

³¹Pegbasa dan kenyan, ontò neluba se pedowan dan tandà te solat sìyan.

³²Nenamay migtoladà si Judas aw si Silas te menge otaw egpemenal, so telekeliwat dan te kagi te Timanem. Inantag dan se pedowan te menge otaw egpemenal amon melobos se pedowan dan diyà te Timanem.

³³Pegkenamay-namay dan kidoen, nesayo si Judas aw si Silas, aw minikagi se menge otaw egpemenal te mèpiya peg-ipanaw dan. Penga niyan, minolì dan doton te Jerusalem.

³⁴Meneng aneng-aneng i Silas, mèpiya aw meg-ogpà sikandin kidoen.

³⁵Meneng mig-ogpà pa si Pablo aw si Bernabe doton te Antyokya. Migtoladà aw mig-indan dan te kagi te Pengolo. Medita heman se otaw migtelaban kandan.

³⁶Pegkenamay-namay, minikagi si Pablo diyà ki Bernabe, “Elew, lomikò ki den doton te kedita te lonsod, sìyan pigtoledaan ta te kagi te Pengolo kedengan, amon ketegahan ta aw eden den se kandan pegpemenal.”

³⁷Ibeg i Bernabe ipetaking dan si Juan, se doma ngadan din si Marcos.

³⁸Meneng eked keibeg si Pablo, so simoway si Marcos kandan kedengan doton te Pampilya, aw wedà ebey pegtelaban kandan.

³⁹Yan migpedindilay si Bernabe aw si Pablo, aw yan se doun te migsoway dan. Penga niyan, impetaking i Bernabe si Marcos, aw simakay dan te dakel belangay pesalo doton te Sipro.

⁴⁰Yan pinemallì i Pablo si Silas tomaking kandin. Migtawal-tawal se menge otaw egpemenal te megtabang se Pengolo kandan te peselowan dan. Penga niyan, nesayo dan.