Menge Ininang 13:2-25

²Doen aldaw migpowasa se otaw egpemenal kidoen te Antyokya, aw megsimba dan te Pengolo. Dalem niyan, minikagi se Espiritu Santo diyà kandan, “Teniyi niyo kanak si Bernabe aw si Saulo, so doen ipeinang ko kandan.”

³Penga niyan, migpowasa dan aw todà dan migtawal-tawal, aw pinemàdan dan si Bernabe aw si Saulo, aw penga niyan impekesayo dan.

⁴Insogò se didowa dan te Espiritu Santo aw yan timegbeng dan pesalo doton te Silusya, aw simakay dan te dakel belangay pesalo doton te polò iningedanan Sipro.

⁵Pegdateng dan doton, timenà dan doton te lonsod te Salamina, aw migtoladà dan te kagi te Timanem doton te menge simbahan te Judiyo. Timaking heman si Juan, se doma ngadan din si Marcos, so migtelaban kandan.

⁶Peglegeb dan doton te menge lonsod te polò sìyan, timaman dan te Papos. Kinità dan se sebad otaw Judiyo si Barjesus. Biyasa ekon sikandin egdelikmata. Migpelingo-lingo sikandin telekeliwat te kagi te Timanem.

⁷Egdoma sikandin te gobirnador te polò sìyan si Sergio Paulo. Ontò biyasa se gobirnador aw impeangay din si Bernabe aw si Saulo, so ibeg din menenalan te kagi te Timanem.

⁸Meneng migsamok kandin se otaw biyasa egdelikmata si Elimas, so yan se gulal din kagi te Griego. Ibeg din megsagda te gobirnador amon eked sikandin pemenal.

⁹Penga niyan, tinebangan te Espiritu Santo si Saulo, doma ngadan din si Pablo. Timengteng sikandin ki Elimas

¹⁰aw minikagi, “Sikona se sakop i Satanas, so sikona se poon te kedita te metòlid. Biyasa ka eg-akal. Eg-ikagi ka te kebolalaw se benal kagi te Pengolo.

¹¹Na, mebota ka te menamay-namay, so ipelumun ka den te Pengolo. Eked ka kità.” Pegketà nebota sikandin. Wedad kinità din. Yan migkawà-kawà sikandin nengemahà te doma otaw meg-agak kandin.

¹²Pegkità te gobirnador kenyan, ontò neleseb se pedowan din nenenalan te kagi te Pengolo, aw yan nemenal sikandin.

¹³Penga niyan, simakay si Pablo aw menge doma din te dakel belangay lekat te Papos pesalo doton te Pampilya. Dimeleg dan doton te Perga. Meneng simoway si Juan kandan so minolì doton te Jerusalem.

¹⁴Nesayo si Pablo aw si Bernabe lekat te Perga aw dimeleg dan doton te Antyokya kidoen te Pisidya. Aldaw te Sebado, dimoton dan te simbahan te Judiyo. Minawop dan aw nenenoo.

¹⁵Migbasa se egpengibing te simbahan te kagi te Timanem insolat i Moises aw menge doma telekeliwat te kagi te Timanem. Penga niyan, nemoyò se egpengibing te simbahan diyà ki Pablo aw si Bernabe, kagi dan, “Menge kedowa day, aw doen itoladà niyo diyà te kedita day netipon, mepakay aw megtoladà kaw den.”

¹⁶Yan timindeg si Pablo aw intakyaw din se belad amon mepenek dan. Minikagi sikandin, “Menge kedomaan ko bowad-bowad i Israel aw kedita niyo kenà Judiyo egtolò heman te Timanem, penenalan kaw te kagi ko.

¹⁷Timanem se egseligan tadon aw sikandin se nemallì te kemonaan tadon. Peg-ogpà dan doton te mediyò ogpeanan te Ehipto, migtabang se Timanem kandan aw migkedita dan. Pineokit te inang metolos, migtabang se Timanem kandan amon mekelowà dan lekat te Ehipto.

¹⁸Dalem te kepatan se omay, inipat dan te Timanem doton te kebigtilan.

¹⁹Dinaeg te Timanem se pito pongan te otaw doton te Canaan, aw imbegay din se tanà diyà te menge Judiyo amon meg-ogpà dan kidoen

²⁰dalem te epat gatos keliman se omay. Penga niyan, doen menge otaw insogò te Timanem teg sebad-sebad amon mengibing kandan lamig te peg-ogpà te sebad telekeliwat te kagi te Timanem, si Samuel.

²¹Penga niyan, ibeg dan doen selotan mengibing kandan. Yan insogò te Timanem se batà i Cis si Saulo, sebad sakop te pongan i Benjamin. Limowan si Saulo diyà kandan dalem te kepatan se omay.

²²Penga niyan, impelowà te Timanem si Saulo aw inselilin din si David limowan kandan, so minikagi se Timanem, ‘Pinemallì ko den se batà i Isai si David. Neluba a kandin so tomanen din se kedita te punù ko kandin.’

²³“Sebad bowad-bowad i David si Jesus. Sikandin se insogò te Timanem amon megpelowà te otaw lekat te salà. Sikandin se tapay din impakang diyà kenitadon, so sikitadon se bowad-bowad i Israel.

²⁴Te wedà pa pegtoladà si Jesus, migtoladà si Juan diyà te menge bowad-bowad i Israel te keilangan megselsel dan te salà amon bonyagan din dan.

²⁵Te wedà pa kematay si Juan, minikagi sikandin, ‘Kenà ko se pinelimanan niyo, meneng doen pa domateng mekeselilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.’