16Yan neeneng-enengan ko se kagi te Pengolo, ‘Kedengan pineokit te wayeg se pegbonyag i Juan. Meneng sebad kemolò se pegbonyag te Timanem kenyo, so te eked kenamay, domateng se Espiritu Santo kenyo.’
17So onawa se imbegay din diyà te menge otaw kenà Judiyo aw diyà kenitadon menge Judiyo te pegpemenal tadon te Pengolo tadon si Jesu Cristo, eked ko kebelebagi se Timanem.”
18Pegdineg dan te inikagi din, wedà den dan sila kandin, meneng induyun dan se Timanem, so minikagi dan, “Pengkey menge otaw kenà Judiyo, mepakay aw megselsel dan te salà aw somalig dan ki Jesus amon begayan dan te Timanem te kaling pedowan.”
19Pegkematay i Esteban, pinemilang se menge otaw egpemenal. Pegkadas dan, migbilit-bilit dan doton te Fenisya, aw Sipro, aw Antyokya kidoen te Sirya. Mig-indan dan te kagi te Timanem diyà te doma dan menge Judiyo mig-ogpà kidoen.
20Meneng doen menge otaw egpemenal tege Sipro aw tege Sirene dimoton te Antyokya, aw migtoladà dan heman tepad ki Jesus diyà te menge otaw kenà Judiyo.
21Migtabang se Pengolo kandan, aw medita se otaw nemenal aw timolò te Pengolo.
22Pegketaga-taga te menge otaw egpemenal doton te Jerusalem, insogò dan si Bernabe doton te Antyokya.
Menge Ininang 11
Menge Ininang 11:16-22