Men Rom 7:19-25

¹⁹Pwe me mau o, me i men wiada, i sota kin kapwaida, a me sued, me i kang, i me i kin wiada.

²⁰A ma i wiada, me i so men wiada, kaidin ngai me wiada, a dip me mi lol i.

²¹Iet me kapung kadiarok ong ia: Ni ai men wiada me mau, me sued mimi re i.

²²Pwe i kin mauki kapung en Kot pali lol en aramas.

²³I ap diaradar eu kapung ni ai kokon akan, me kin palian kapung en loli, ap kalua ia di pan kapung en dip, me mi nan ai kokon akan.

²⁴O ngai aramas luet amen! Is me pan kamaio wei ia sang ni war mela wet!

²⁵I danke Kot pweki Iesus Kristus atail Kaun. Nan lol i i kin papang kapung en Kot, a ni pali uduk kapung en dip.