Men Rom 1:5-18

⁵Me kit ale janer mak o koa en wanporon, pwen padaki on men liki kan karoj ni mar a, pwe irail en pojon o peik,

⁶Pwe komail pil kijan irail, me paeker don Iejuj Krijtuj.

⁷Komail karoj kompoke pan Kot, me paeker me jaraui kan, me mimi Rom mak o popol jan ren Kot Jam atail o Kaun Iejuj Krijtuj en mi re omail!

⁸Iet kaieu, i kin kapina ai Kot ki Iejuj Krijtuj pweki komail karoj; pwe omail pojon me kalok jili lel penan jap karoj.

⁹Pwe Kot, me i kin papa on ni nen i ni ai padapadaki wei ronamau en japwilim a Ol, me jaunkadede pai, me i kin tamataman kin komail anjau karoj, nidinid ni ai kapakap akan.

¹⁰Nidinideki anjau karoj, ma i jota pan kak pwarala re omail, ma iduen kupur en Kot.

¹¹Pwe i inon ion udial komail, pwe i en katunole kin komail ekij pwaij nenin, pwe komail en tinainda.

¹²Pwe i en kajarloleid re omail, pweki atail pojon ta ieu.

¹³Ari, ri ai ol akan, i jota men, me komail en jaja duen ai kileledier pan pak toto, en pwar won komail, ap jaik pijoki on, pwen diar ekij wan ai dodok re omail, dueta ren wei tei kan.

¹⁴Pwe nai me pwaipwand on men Krik o men liki kan, o on me lolekon o me jo lolekon kan.

¹⁵Pwe duen a pan kak pai, i men pil padaki on komail men Rom ronamau.

¹⁶Pwe i jota kin namenok ki ronamau, pwe i manaman en Kot, me kin kamaurela me pojon akan karoj, Juj oko maj, ap pil men Krik.

¹⁷Pwe i me kin kajanjaleda pun en Kot, me kin pwili jan pojon, pwen pojon duen a intinidier: Me pun o pan memaureki pojon;

¹⁸Pwe onion en Kot pan janjaleda jan nanlan on me doo jan Kot akan o me japun en aramaj akan, me kin kawela melel ni arail japun.