MELKAHKA KAN 90:1-11

¹Maing ei Kaun, komwi me dewat ahnsou koaros.

²Mwohn nahna kan ar wiawihda, mwohn omwi ketin kapikada sampah, komwi Koht poatopoat emen, oh pahn wia Koht kohkohlahte.

³Komw ketin kilelehiong aramas akan pwe re en pwurehng wiepwella; komw ketin kapwureiraillahng nan pwehl.

⁴Pwe mwohn silangmwi pahr 1000 rasehng rahn teieu, duwehte aio, me samwalahr, rasehng ahnsou mwotomwot kis nipwong.

⁵Komw kin ketin koakoaikit sang nin sampah, rasehng lapake ieu; oh se rasehng ouraman ehu. Se rasehng reh me wosada nimenseng,

⁶kekeirda oh masalpeseng, a nin soutik e kin mengila.

⁷Omwi engieng me kin kamwomwkitala; se kin masepwehngkihda omwi engieng mwuledek.

⁸Komw kin ketin kasalehda mwohmwi dipat akan, oh dipat rir kan wasa me pahn kak sansalohng komwi.

⁹At mour kin mwotomwotkihla omwi engieng; at mour kin mwadang sohrala, rasehng mwenginingin ehu.

¹⁰Sounpar 70, ihte werein at mour— a ma se kehlail, e pahn lel 80; ahpw pahr pwukat kin kahrehiong kiht pwunodte oh apwal; mour kin mwadang imwisekla, oh se solahr mie.

¹¹Ihs me pehmehr ia uwen mwuledek en omwi engieng? Ihs me kak ese kamasepwehk en omwi engieng?