Megwewali 3:3-19

³duen timpu te kedhimatey wey timpu zaan te kebawì, duen timpu te kedrundus wey timpu zaan te ked-uman kedtukud,

⁴duen timpu te kedsineǥew wey timpu zaan te ked-engit, duen timpu te kedlalew wey timpu zaan te kedsayew,

⁵duen timpu te kebpeyapat te menge vatu wey timpu zaan te kedtiǥum te menge vatu, duen timpu te kegkepkep wey timpu zaan te kenà kegkepkep,

⁶duen timpu te kebpen-ahà wey timpu zaan te kedtazin, duen timpu te kedtipig wey timpu zaan te kedlaga,

⁷duen timpu te kebindas wey timpu zaan te kedapi, duen timpu te kebpereremek wey timpu zaan te kegkaǥi,

⁸duen timpu te kebmahal wey timpu zaan te kedumut, duen timpu te kedtebek wey timpu zaan te kebpeelukuyà.

⁹Hengkey is egkekuwa te menge etew pinaaǥi te langun he hineǥuan dan?

¹⁰Neehè ku is menge vuluhaten he imbeǥey te Megbevayà he igkeipeng te etew.

¹¹Ne heini ne inteǥane en te Megbevayà is egkengehitavù dutun te hustu he timpu. Mibeǥayan ki zin te penganduy he metueni ta is peleebuten, piru kenè ta heini egketegkad is menge mibeelan din puun pa te puunà taman te ketepusan.

¹²Netuenan ku he is pinekemeupiya he ebeelan te etew te kemulu pa sikandin uuyag ne iyan is kedlipey, is kebaal te meupiya,

¹³is kegkaan wey ked-inum, wey kedlipey zin te midheǥuan din. Heini he menge vutang ne tuvad te Megbevayà.

¹⁴Ne netuenan ku he is mibeelan te Megbevayà ne ebpedayun taman te taman, ne kenè en heini egkevelvelewanan. Mibeelan heini te Megbevayà para medtahud is etew kandin.

¹⁵Ne ke hengkey is nehitavù guntaan wey is egkehitavù pa te huziyan he timpu nehitavù en heeyan. Su id-ulit-ulit dà te Megbevayà is menge nehitavù.

¹⁶Neehè ku he kayi te kelibutan he kelelalung is ebpedayun, ne kenà iyan is hustu he kukuman wey ketazeng.

¹⁷Ne nekekaǥi a ziyà te ǥehinawa ku te, “Edhukuman te Megbevayà is metazeng wey menge lalung he menge etew, su zuen intail zin he timpu te uman sevaha he vuluhaten.

¹⁸Migezaman te Megbevayà is menge etew para ikepaahà kandan he iring dà sikandan te menge langgam.

¹⁹Is etew wey langgam ne neked-iring dà is egkepengkusan dan; pudu sikandan ebpatey. Neked-iiring sikandan he egeǥehinawa, umbe wazà mibizahaayan te etew wey langgam. Tutuu iyan he is langun wazè din pulus.