Text copied!
CopyCompare
Is Lalag te Megbevayà - Megwewali - Megwewali 2

Megwewali 2:4-19

Help us?
Click on verse(s) to share them!
4Mibaal a te zezekelà he menge vutang: midtukud a te menge valey ku ne mibpemula a te menge paras.
5Mibpevaal a zaan te menge pemuleey he mibpepemulaan ku te langun he kelasi te menge prutas.
6Mibaal a zaan te menge risirbuwir para metiǥum ku is wahig su wey ku mepetudai is mahabet he menge kayu ku.
7Nemasa a te menge uripen menge maama wey menge vahi, ne is duma ne ziyè en mengeetew te valey ku. Ne iyan a utew mahabet is menge uyaǥen te langun he nekeubpà diyà te Jerusalem.
8Ne midtiǥum a zaan te zekelà he selapì, bulawan, wey zuma he menge ketiǥeyunan he ebpuun te menge hadì wey ziyè te menge lugar he nesakup ku. Mezakel is memetau he menge perekanta ku, he menge maama wey menge vahi, ne zuen ku mahabet he menge esawa. Naangken ku is minsan hengkey he egkesuatan te etew!
9Iyan a pinekesepian te langun he etew he nekeubpà diyà te Jerusalem, ne wazà maawà is keuluwanen ku.
10Migkuwa ku is minsan hengkey he egkesuatan ku. Mibeelan ku is minsan hengkey he ebpekelipey kedì. Ne utew ku ingkelipey is langun he menge vaal ku, ne iyan heini vales te menge kedhaǥù ku.
11Piru hein mibpurungan ku is-isipa is langun kayi te mibeelan ku, iyan neuma te isip ku is wazà pulus kayi te langun. Iring dà te edal-as a te keramag. Wazà iyan pulus te kedhaǥù kayi te kelibutan.
12Hengkey pa is egkehimu te ebpekesunud he menge hadì? Hengkey pa kekenà, iyan ded kes neveelan en duen te nehuna kandan. Migezaman ku te edhindeg is ketau wey ketutulebungi.
13“Meupiya is ketau kenè te ketutulebungi, su iring ded heini te kerayag su zeyzey heini te kerusireman.”
14Su is uluwanen he etew egketuenan din ke hendei sikandin ebpekepevayà, iyan is tulebung mulà ne kenà. Iyan, netuenan ku he ebpeked-iring is egkepegkusan dan te dezuwa su ebpatey zan pudu.
15Umbe, nekekaǥi a ziyà te ǥehinawa ku te, “Ke hengkey is egkeula-ula te tulebung iyan daan egkeulaula kedì. Umbe hengkey is egkekuwa ku he keupiyaanan kayi te ketau ku? Wazà iyan kayi pulus!
16Su ebpatey pudu is uluwanen he etew wey is tulebung, ne te huziyan he menge andew ne pudu sikandan egkelipati.”
17Umbe, wazà mekepenunuat kedì is kebpengungubpaan ku, su is menge vuluhaten kayi te kelibutan ne iyan nekeuwit kedì diyà te kemereǥenan. Heini is langun wazè din pulus; henduen e zà te edal-as te keramag.
18Nesuǥey a su geina te kinahanglan he igketaǥak ku ziyà te zuma is rimeǥas te menge kedhaǥù ku.
19Ne wazà ku en metueni ke metau ve wey ke tulebung is ebpekepangevilin. Piru iyan dan en ebpekevayàbayà te minsan hengkey he egkekuwa ku pinaaǥi te ketau ku wey kedhaǥù ku. Wazè kayi pulus.

Read Megwewali 2Megwewali 2
Compare Megwewali 2:4-19Megwewali 2:4-19