Megwewali 2:12-26

¹²Hengkey pa is egkehimu te ebpekesunud he menge hadì? Hengkey pa kekenà, iyan ded kes neveelan en duen te nehuna kandan. Migezaman ku te edhindeg is ketau wey ketutulebungi.

¹³“Meupiya is ketau kenè te ketutulebungi, su iring ded heini te kerayag su zeyzey heini te kerusireman.”

¹⁴Su is uluwanen he etew egketuenan din ke hendei sikandin ebpekepevayà, iyan is tulebung mulà ne kenà. Iyan, netuenan ku he ebpeked-iring is egkepegkusan dan te dezuwa su ebpatey zan pudu.

¹⁵Umbe, nekekaǥi a ziyà te ǥehinawa ku te, “Ke hengkey is egkeula-ula te tulebung iyan daan egkeulaula kedì. Umbe hengkey is egkekuwa ku he keupiyaanan kayi te ketau ku? Wazà iyan kayi pulus!

¹⁶Su ebpatey pudu is uluwanen he etew wey is tulebung, ne te huziyan he menge andew ne pudu sikandan egkelipati.”

¹⁷Umbe, wazà mekepenunuat kedì is kebpengungubpaan ku, su is menge vuluhaten kayi te kelibutan ne iyan nekeuwit kedì diyà te kemereǥenan. Heini is langun wazè din pulus; henduen e zà te edal-as te keramag.

¹⁸Nesuǥey a su geina te kinahanglan he igketaǥak ku ziyà te zuma is rimeǥas te menge kedhaǥù ku.

¹⁹Ne wazà ku en metueni ke metau ve wey ke tulebung is ebpekepangevilin. Piru iyan dan en ebpekevayàbayà te minsan hengkey he egkekuwa ku pinaaǥi te ketau ku wey kedhaǥù ku. Wazè kayi pulus.

²⁰Umbe, nesuǥey-a te langun he midheǥuan ku kayi te kelibutan.

²¹Minsan pa ke edhaǥù ka duma is keuluwanen wey abilidad, igketaǥak nu zà is langun he midheǥuan nu ziyà te menge etew he wazà iyan medhaǥù kayi. Wazà kayi pulus, ne utew heini mezaat.

²²Hengkey is egkekuwa te etew te kedhaǥù din wey kebpeningkamut din kayi te kelibutan?

²³Dutun te kedterebahu zin egkeseǥazan din is kegkesekiti wey kegkeseeng ne minsan mezukilem ne kenè en ebpekehimeley is isip din. Utew heini wazè din pulus.

²⁴Umbe, is utew meupiya he ed-ul-ulahan te etew iyan is kegkaan wey ked-inum, kedlipeylipey zuen te hineǥuan din. Ne neisip ku he minsan heini ebpuun diyà te Megbevayà.

²⁵Su ebmenmenuwen ta he mekekaan ki wey mekelipeylipey te hineǥuan ta emun kenà heini ibeǥey te Megbevayà?

²⁶Megbevayà is ebeǥey te ketau, keuluwanen wey kelipey zutun te menge etew he ebpekepenunuat kandin. Iyan, is menge mekesesalà mibpengelinteuwan din he mebpenigudu sikandan te kedtiǥum te menge azen su is egkengetiǥum dan ne ibeǥey zin diyà te menge etew he nekepenunuat kandin. Is kedhaǥù te menge mekesesalà wazè din pulus; henduen dà te edal-as sikandan te keramag.