Megwewali 2:1-8

¹Guntaan egezaman ku is kedlipeylipey para metueni ku ke hengkey is meupiya he kebpengungubpaan. Ne nesusi ku he wazà daan dutun pulus.

²Su is ked-engit wey kedlipeylipey tinulebung dà ne wazè din pulus.

³Migezaman ku he edlipeylipey a pinaaǥi te vinu. Ne minsan uluwanen a, migezam a medtinulebung. Neisip ku he kela ke iyan heini kineupiyahan he ereg he ebeelan te etew kayi te mevavà he kebpengungubpaan din kayi te kelibutan.

⁴Mibaal a te zezekelà he menge vutang: midtukud a te menge valey ku ne mibpemula a te menge paras.

⁵Mibpevaal a zaan te menge pemuleey he mibpepemulaan ku te langun he kelasi te menge prutas.

⁶Mibaal a zaan te menge risirbuwir para metiǥum ku is wahig su wey ku mepetudai is mahabet he menge kayu ku.

⁷Nemasa a te menge uripen menge maama wey menge vahi, ne is duma ne ziyè en mengeetew te valey ku. Ne iyan a utew mahabet is menge uyaǥen te langun he nekeubpà diyà te Jerusalem.

⁸Ne midtiǥum a zaan te zekelà he selapì, bulawan, wey zuma he menge ketiǥeyunan he ebpuun te menge hadì wey ziyè te menge lugar he nesakup ku. Mezakel is memetau he menge perekanta ku, he menge maama wey menge vahi, ne zuen ku mahabet he menge esawa. Naangken ku is minsan hengkey he egkesuatan te etew!