Text copied!
CopyCompare
Is Lalag te Megbevayà - Megwewali - Megwewali 10

Megwewali 10:4-20

Help us?
Click on verse(s) to share them!
4Emun egkepeukan ka te pengulu kenè nu vey-ani is ketengdanan nu, su emun egkevehew en is pauk din kela ke peseyluwa ke zin minsan dekelà is salà he nehimu nu.
5Duen pa sevaha he kenà meupiya he neehè ku kayi te kelibutan, ne ed-ul-ulahan heini te menge pengulu:
6Is menge tulebung ebeǥayan dan te metikang he keǥehem, piru is menge sepian mulà ebeǥayan te mevavà he keǥehem.
7Neehè ku zaan he zuen menge uripen he ebpurung dà ebpemen-untud te kudà ne sikan is dungganen he menge etew ne ebpemenhipanew zà he iring te menge uripen.
8Emun ebangbang ka, kela ke meulug ka zuen. Emun edlesag ka ziyà te verengbeng te inged, kela ke keǥata ka te uled.
9Emun edlekat ka te vatu etawa egurey ka te kayu, kela ke mepelii ka,
10Emun mezumpel is wasey nu ne wazè nu heini kemengaa, ne kinahanglan he ebpendesendesen ka is egamit dutun. Meupiya ke uluwanen ka su pinaaǥi kayi ebpekezaag ka.
11Emun duen nu ketau para kenà mekekaǥat is uled ne wazà dutun pulus emun nekaǥat ke zin en.
12Is menge ebpengeǥiyen te uluwanen he etew ne ebpekeveǥey kandin te keupiyaanan, piru is menge ebpengeǥiyen te tulebung he etew ne ebpekezezaat kandin.
13Kebpuun din kegkaǥi ne tinulebung en is menge ebpengeǥiyen din, ne emun ebpengkusen din en is menge lalag din ne mezaat en is ebpengeǥiyen din, ne henduen be sikandin te ebuneǥen en.
14Ne kenè en sikandin ed-engked he egkaǥi. Wazà netau te edtelinguma, ne wazà ebpekekaǥi ziyà te kenita ke hengkey is egkehitavù emun ebpatey ki en.
15Igkeveley te tulebung is terebahu zin, umbe egkeisip din he kenè en sikandin edhendiyà te inged su para kenà meketerebahu.
16Mekehizuhizu is nasyun he mid-aǥi te kegkeuripen is hadì duen, ne is menge pengulu kayi ne ebpetakè en ebpengemuran.
17Iyan, utew zeyzey is nasyun he is hadì duen neetew he ebpuun te pemilya he meupiya is dengeg din, ne is menge pengulu zuen id-ehè dan te hustu he timpu is kedlipeylipey zan pinaaǥi te kegkaan wey egkeeǥen dan is suat dan ne kenè dan ebpekepelelangut.
18Emun igkepeǥuli te etew is kebpurung ta atep te valey zin, ne edtiǥisan heini ne egkewaǥey.
19Is kegkaan wey ked-inum ebpekeveǥey te kelipey ziyà te etew, ne is selapì ebpekeveǥey te langun he egkinehenglanen te etew.
20Kenè nu rewaki is hadì minsan pinaaǥi zà te isip nu, wey is sepian minsan meeles dà, su kela ke zuen meketudtul kayi ziyà te kandan.

Read Megwewali 10Megwewali 10
Compare Megwewali 10:4-20Megwewali 10:4-20