Mbouŋ to Yes Israela 91:4-13

⁴Pale iŋgin ghom ila nima samba inimale tatareek ipakud ndinatu ila bage samba. Yes to tiyooŋ ila toni, pale tineep pooi. Pasa, ye itataghon saveeŋ mbuaaŋ toni. Ŋgar tonenen pale inim sigeu payom, ve ipoon ghom pa mbeb samsamia.

⁵Tovenen yom irau umatughez pa mbeb samsamia to mboŋ maau. Ve ndag paam, irau umatughez pa koiamŋa pane todi ndinatu maau.

⁶Tovenen moroghooŋ samsamia to ighamgham tamtoghon pa mboŋ, ve pataŋani to irabrab di pa ndag, yom irau umatughez padi maau.

⁷Ighaze tamtoghon ndiŋndiŋ eez (1000) timatmaat ve titaptap ila digem, ma tamtoghon ndiŋndiŋ saaŋgul (10,000) to tiluvut ghom timatmaat, yom umatughez malep. Pasa, mbeb samia eta irau inim igharau ghom maau.

⁸Atia to iza to ndiran samsamia, yom pale unepneep, ve ughita katini pa taum matam.

⁹Pasa, yom uyoŋyooŋ ila to Yoova, ve ye inim inam to nepooŋ. Maaron Tiina To Ilib Pa Ndimaronŋa Tisob iŋgin ghom. Tauto uneep pooi ila samba.

¹⁰Tovenen mbeb samia eta irau iwaghamun ghom maau, ve moroghooŋ samia eta irau igharau inam to nepooŋ maau.

¹¹Pasa, Maaron pale imbaaŋ aŋela toni pa tiŋgin ghom. Ndug sine to ughaze ula pani, yes pale matadi payom.

¹²Pale tikis ghom pa nimadi, ve tipalot ghom. Leso utut aghem ila yaam sob.

¹³Ighaze utut laion paghu, ma uvazag moot samia eta, nene irau tigham mbeb eta payom maau.