Mbouŋ to Yes Israela 88:1-13

¹Yoova, yom Maaron tiou ve Volaaŋa tiou. Ndag to naol ne, nataŋtaŋ, ve taŋiiz tiou iŋaŋarua ghom naghaze uul ghou. Ve mboŋ paam, nanim naneep ila naghom, ve nasuŋsuŋ payom.

²Ulooŋ suŋuuŋ tiou tonene. Ughur taliŋam pa taŋiiz tiou, ve uul ghou.

³Pasa, pataŋani naol titatan ghou, ve naghita naghaze naneep ila naal avo wa.

⁴Tamtoghon tighita ghou tighaze paam namaat ve nazila ndug to mateeŋa. Pasa, tapirig isob kat wa.

⁵Tamtoghon tighita ghou nanimale namaat wa. Tauto lolodi imaagh payou, ve eŋgengou naneep. You nanimale ndiran to tirab di timatmaat, ve tisuruuv patudi tizila naal. Ve nanimale yes mateeŋa to yom irau uul di muul maau, ve lolom imaagh padi.

⁶Yom ughur ghou nazila saambu to mateeŋa to izila le izila kat. Naneep sila kat ila ndoroom lolo.

⁷Mbalmbali tiom itatan ghou kat, inimale dibom tintina tipolpol izala poghog ve titatab ghou.

⁸Yom ugham nditag tipul ghou. Lolodi pa tighita ghou maau. Pasa, ŋgar to ugham payou ne, igham di tighita ghou nanimale mbeb samia. Nepooŋ tiou, nene inimale naneep ila ruum to yabyabuuŋ lolo, ve leg ataam pa navot maau.

⁹Yoova, ndag to naol ne, you nakaak nimag iza, ve nataŋtaŋ roran ghom pa uul ghou. Lolog ipataŋan kat, ve nataŋ tiina le matag isarsar.

¹⁰Laak, yom ugham mbeb gharatooŋa eta pa yes mateeŋa leso uul di? Ma mateeŋa irau timundig, ve tipait izam? Maau.

¹¹Ve yes to tineep ila naal lolo, tisasavia ŋgar tiom to lolom ineep tuŋia ila to tamtoghon tiom ve uluul di? Ma yes to tineep izi ndug to mbeb tisamsami pani, tisavsaav pa ŋgar tiom to utataghon saveeŋ mbuaaŋ tiom? Maau.

¹²Ve yes to tineep ila ndoroom lolo, tiwatag mbeb gharatooŋadi to ughamgham di ne? Ma mateeŋa to tamtoghon lolodi imaagh padi, matadi iŋgalŋgal ŋgar tiom deŋia? Maau kat!

¹³Eemoghon you, ghoro nataŋtaŋ payom naghaze uul ghou. Yoova, mboŋmaagh to naol ne, suŋuuŋ tiou iŋaŋarua ghom.