Mbouŋ to Yes Israela 81:3-13

³Sawa to kaiyo iza paghu, ve sawa to kaiyo imatu, nene sawa to talup ghiit ve tasuŋ. Tovenen avib tavuur ve apamundigin suŋuuŋ.

⁴Pasa ŋgar tovene, nene itaghon tutuuŋ to Maaron ighuri pa iit Israela alok wa. Maaron to Yakop ighaze tataghon tutuuŋ tonene.

⁵Sawa to ye igham malmal pa yes Isipa, ye isaav pa iit Israela ighaze tataghon tutuuŋ tonene, leso itiŋa talup ghiit tanim ee moghon. You nalooŋ ŋgeu eez aliŋa inim. To muuŋ ve inim, nalooŋ aliŋa tovene maau. Isaav ighaze:

⁶“You to nazugua mburuguuŋ pataŋani izi pa avaramim, ve nagham gham atemim izi pa badooŋ mbeb.

⁷Muuŋ, yam aneep ila pataŋani tiina lolo, ve ataŋ roran ghou pa nauul gham. Ve you nalooŋ taŋiiz tiam, ve napas gham avot pa pataŋani tiam. You nayooŋ ila yaghur tae asosooŋa to lalaav avolutu ivotvot pani, ve napamuul aliŋamim. Ve natoov gham izi ya dige to ndug Meriba.

⁸Yam tamtoghon tiou, alooŋ saveeŋ ariaŋa to naghaze nasavia payam. Yam Israela, aghur taliŋamim pa aliŋag tonene ve ataghoni, ghoro poia!

⁹Maaron ite paam ineep ila lolomim ve ambees pani malep. You moghon, ghoro ambees payou. Tovenen aput aghemim pa maaron kaaromŋa to ndug pida malep.

¹⁰Pasa, you Yoova to Maaron tiam. You to nagham gham apul Isip. You nasaav payam naghaze: Akaak avomim tiina. Leso napavonini pa mbeb popoiadi.

¹¹Eemoghon tamtoghon tiou tilooŋ aliŋag maau. Yes Israela tiyasiil payou.

¹²Ŋgar todi iyaryaaŋ kat. Lolodi pa tilooŋ saveeŋ maau. Tauto napul di titaghon taudi ŋgar todi.

¹³You nakausim naghaze le tamtoghon tiou tilooŋ aliŋag, ve titaghon ataam tiou!