Mbouŋ To Yes Israela 7:3-17

³O Yoova, Maaron tsiau, zeran tau tighe tigham saghatin ghau, yau nagham sosor eta pazi mako.

⁴Tamtamon tau yeŋa nimbu saveeŋ to nivalupu ghei nimin eemon na, yau nagham ŋgar saghati eta pazi mako. Ve yes tau tighur koi payau sorok na, yau naum gabua toozi eta mako.

⁵Isaav ighe yau nagham sosor tauvene, ene poia pa koiagŋa tigham taghon ghau ve tikis ghau, ve tivaghaaz ghau ila taan ve nagheen ila ŋgaupup.

⁶Yoova, uburig toman atem yavyav, ve ureu koiagŋa. Pa atezi yavyav kat payau. Maaron tsiau, uburig rekia mon ve uul ghau. Ughur atuya iŋarui koiagŋa pa ŋgar tau yes tighamu na.

⁷Uyau tamtamon tisov tilam tilup zi ila yo naghom. Uleep ila niam to ghamuuŋ pooz izi nugh sambam, ve ugham pooz pazi.

⁸Yoova, yo ugabiiz tamtamon to nugh nugh, ve ughur atuya pazi. Ugabiiz ghau ve upaghazoŋai ghau ila tamtamon matazi, leso tiwatagh tighe yau ŋeer duduŋag, ve gabuag tomania ŋgar tsiau isov, ene poia mon.

⁹Maaron, ŋgar tau yo ughamghamu na, ene iduduuŋ mon. Ve yo uwatagh katin tamtamon lolozi ve ŋgar toozi. Zeran sasaghati tau tighamgham malmal na, upasov ŋgar toozi saghati tawe. Ve upalot zeran duduŋazi, leso tiyooz ariaaŋ.

¹⁰Maaron, yo mon ta umin sigheu payau. Yes tau ŋgar duduuŋa igheen ariaaŋ ila lolozi na, yo ugham mulin zi pa pataŋani toozi.

¹¹Maaron, gabizooŋ tsio, ene iduduuŋ mon. Saawe isov, yo utotoi aatyavyav tsio pa zeran sasaghati.

¹²Tamtamon tau ighe titoor ŋgar toozi mako, ene pale Maaron ipot mbuzaagh ve iyool paneegh tooni to ighur atuya pazi.

¹³I igharaat zaab tooni pataghaaŋ to irav zi. Ve igharaat paneegh tooni natŋa toman yav, leso ivanegh zi.

¹⁴Zeran sasaghati timin livaa tau aapo ve ighe ipoop. Pasaa, lolozi ivon pa ŋgar sasaghati naol tau tighe tigham pa tamtamon. Ve murei, mako anooŋa to ŋgar tau igheen ila lolozi na ivot ighazooŋ. Ene karom naol to tivaghamunia tamtamon.

¹⁵Ŋeer tau ighe itai puura pa tamtamon eta, ene pale tauu itap izila puura tana.

¹⁶Ŋgar saghati tau i ighe igham pa tamtamon, ene pale imuul pa tauu. Ve malmal tau i ighe igham pazi, ene pale ivaghamunia i tauu.

¹⁷Yau lolog poia pa Yoova, ve napakuru pa ŋgar tooni duduuŋa. Yau nambou mbouŋ to napait i eeza. Pa Yoova, i Maaron tiina kat tau iliiv zimaronŋa tisov.