Mbouŋ To Yes Israela 78:32-49

³²Yes Israela tighita gabua naol isov tawe. Eemon tinoknok ghamuuŋ sosor soone. Tikaria ghitooŋ gabua ŋgeretazi. Eemon tighur ila to Maaron mako.

³³Tauta i iŋgoor saawe toozi tuuku. Lepoogh toozi isov rekia mon imin yaghuraan tau ivotvot ila avoon. Mateegh ipateeŋ zi, le roiŋ tiina igham zi.

³⁴Onoon, saawe tau Maaron irav tamtamon toozi siriv, rekia mon ve eval tiina tighilaal, ve titoor ŋgar toozi imuul ila pani, ve tisuŋ pani ariaaŋ tighe loolo isaghatin zi ve ireu sosor toozi.

³⁵Ve matazi iŋgal muul tighe: Maaron, i iponpoon zi imin maetaaz tau izala kat. Maaron Tiina Tau Iliiv Zimaronŋa Tisov na, i ta Uleeŋa toozi.

³⁶Eemon tipaiti pa avozi uuli mon. Saveeŋ tau ivotvot ila avozi na, tisavia toman lolozi mako. Tigham karom.

³⁷Lolozi ikis Maaron ariaaŋ mako. Ve saveeŋ tau yesŋa Maaron timbua na, matazi kisini ve titaghoni mako.

³⁸Eemon Maaron loolo isasaghatin zi, ve ireureu sosor toozi. Tauta ivaghamun zi kat mako. Onoon, saawe naol, i aate yavyav pazi kat. Eemon iyai ghi, ve itatan aatyavyav tooni.

³⁹Pasaa, maata iŋgal ighe: Yes to taan mon. Tapirizi tiina mako. Tileep rig, ve tilalez, imin yaghur tau talooŋ luutu ilam, ve isov.

⁴⁰Saawe tau tileep izi nugh ŋginaaŋa, tizoor Maaron aliiŋa pai katini. Yes tilaghlaagh ila nugh tau sausau mon, ve tighamgham Maaron loolo ipataŋan.

⁴¹Maaron Patabuyaaŋ to yes Israela, yes tinoknok tovaaŋni. Tauta tipas aate, le aate yavyav kat.

⁴²Yes lolozi iveghveegh pa Maaron tapiri. Matazi iŋgal saawe tau i igham mulin zi ila koiazŋa nimazi na mako.

⁴³Muuŋ, i igham gabua ŋgeretazi katini ivotvot izi Isip to itotoi tapiri pazi. I ighamgham uraat tintiina izi taan raraate to Zoan. Uraat tawe, tamtamon tighita le ŋgar toozi imbool.

⁴⁴I itoor yaa tintiina to yes Isipa timin siŋ. Tauvene yes Isipa lezi yaa eta to ghunuuŋ mako.

⁴⁵Ve igham nimnim tintiina tau tiŋutŋut tamtamon na tivot izi nugh toozi, ve tiŋut zi le tisaghat kat. Ve igham gob katini tivot le tivaghamun zi paam.

⁴⁶Ve igham siis tivot le titav nugh toozi, ve tighan aniiŋ toozi. Uum tau tighun punitazi pani na, siis tighaniir gabua to uum tawe le isov.

⁴⁷Ve igham ais paatu paatu titaptap tizi, le ivaghamunia ai vaen toozi. Ve uman tiina tomania ais izi le ivaghamunia ai fik toozi paam.

⁴⁸I igham ais paatu paatu titaptap tizi, ve irav makau toozi timatmaat. Ve igham lalaav iŋgalŋgal sipsip toozi.

⁴⁹Maaron aate yavyav le yavyav kat. Loolo basbasuuŋ, ve irau aate izi muul mako. Tauta ighur yes Isipa muul mako, ve aatyavyav tooni izaa toozi kat. I imbaaŋ aŋela tooni eval tila tivaghamun zi pa moroghooŋ saghati.