Mbouŋ to Yes Israela 68:14-32

¹⁴Sawa to Maaron ariaŋa ireu mbirisan yes kinik, ye igham ais patu patu titaptap tizi ila lolooz Zalmon. Tauto inaan di tighau tila.

¹⁵Lolooz to ndug Basan, nene tiina ve daba izala kat, ve le mbuŋa mbuŋa ve kazimuŋa katindi. Daba izala kat, tauto ye le iza.

¹⁶Lolooz to ndug Basan, yom lem mbuŋa mbuŋa naol. Pughu vena to ughita Maaron igham lolooz Zion inim ina to nepooŋ, ve ireu lolom? Tauto lolom isami pani ne? Onoon kat, ye pale ineep izi lolooz tonene itaghoni taghoni gha ila.

¹⁷Ŋgeu Tiina ipul lolooz Sinai, ve ilaagh toman karis toni ndiŋndiŋ ndiŋndiŋ to malmal, le tila tivot izi ina patabuaŋ to Zion we.

¹⁸Maaron, yom ughereb koiamŋa katindi to ulib padi ne, ve titaghon ghom, ve yamŋa azala lolooz tiom daba to sala we. Tamtoghon tigham lem mbeb popoiadi naol. Yes to tizorzoor aliŋam ne paam, tiput aghedi payom, ve tigham lem mbeb. Onoon kat, Maaron toit Yoova, moghon moghon ye inepneep izi lolooz toni tonene.

¹⁹Tapait Ŋgeu Tiina pa poia toni! Ndag to naol ne, ye iuluul ghiit pa badooŋ pataŋani toit. Maaron toit, ye Maaron to ighamgham mulin ghiit pa pataŋani toit.

²⁰Maaron toit, ye Maaron to ulaaŋ. Onoon kat, Maaron toit Yoova, ye ighamgham mulin ghiit. Tauto tamaat maau, ve taneep pooi.

²¹Maaron pale irab balagin koia dabadi. Tamtoghon to titaghon ataam samia, ve tighamgham sosor, ye pale irab mbirisan dabadi rubruuba, le tisob timatmaat.

²²Ŋgeu Tiina isaav ighaze: “Koiagŋa irau tighau maau. Ighaze tineep izi lolooz to ndug Basan, ma tineep sila kat izila mazovan, nene pale nagham di tisob timuul tinim.

²³Siŋidi pale ireer izi, le ipot inimale karoos ila taan pogho, leso awai ila. Ve ŋgavuun tiam pale tighuni le isooŋ di.”

²⁴Maaron, yom kinik tiou. Yom ulib pa koiamŋa wa. Tauto aazne, unum toman lolom poia, ve ulooŋ ula rumai tiom patabuaŋ ila ival tiina matadi. Yom umuuŋ, ve tamtoghon tiom titaghon ghom ve yamŋa alooŋ ala.

²⁵Yes to mbouŋ timuuŋ, ve ndiliva papaghu titoktok kakaap, ve titaghon di. Ve yes to tipambar ambam, ve yes to tivivib sab ve tavuur tilaagh muri.

²⁶Yam Israela to avot ila to Yakop, alup gham ila Maaron nagho ve apaiti pa poia toni. Yam asob apait Yoova iza!

²⁷Aghita. Rumai to Benyamin to ival maau ne, timuuŋ. Ghoro yes daba to Yuda toman tamtoghon todi titaghon di. Ve yes daba to Sebulun ve Naptali tilaagh muri.

²⁸Maaron, yom usaav ariaŋa pataghaaŋ ughaze yei Israela pale lemai tapirimai tiina, ve niyoon ariaŋa. Upatooŋ tapirim payei muul, inimale muuŋ upatooŋa payei.

²⁹Yes kinik to taan pale tinim tivot Yerusalem, ve tigham lem mbeb popoia ilooŋ ila rumai tiom patabuaŋ.

³⁰Yes Isipa tinepneep ila vivib lolo to ya Nil dige we tinimale poghai. Ve yes kinik to ndug pida tilaghlaagh toman ndaaba todi tinimale makau ketooŋ to tiketkeet toman ndinatudi. Uyaan koiamai tonowen, leso tiput aghedi payom, ve tighur yaam silva todi inim lem pa tipakur ghom. Ndug ndug to lolodi pa ghamuuŋ malmal, ureu mbirisan di.

³¹Kinik to yes Isipa pale imbaaŋ uraata toni tinim Yerusalem, leso yeiŋa nisavsaav pa lupuuŋ tiei. Ve tamtoghon to Etiopia paam, pale rikia tikaak nimadi iza, ve tisuŋ pa Maaron.

³²Yam kinik to taan toman tamtoghon tiam, ambou pa Maaron. Ambou pani ve apaiti.