Mbouŋ To Yes Israela 60:2-8

²Malmal tau ivot ne, ene imin ugham taan tsiei irur le ivavaal, ve aavo ikaak. Nugh tsiei isaghat wa. Tauvene nitaŋ rarai ghom nighe ugharaat mulin nugh tsiei. Mako pale nisaghat le nisaghat kat.

³Yei tamtamon tsio. Eemon yo ugham pataŋani tiina kat ivot payei. Nighita saawe tane saghati kat. Aatyavyav tsio izaa tsiei, le igham ghei nivaghamgham imin upaghun ghei pa yaa ariaaŋa.

⁴Saawe tau saghatiiŋ tane ighe ivot payei, yo utotoi pilak tsio pa yei tau niroi payo ve nitaghon ŋgar tsio. Leso niŋarui ghom nilat, ve upoon ghei pa koiamaiŋa.

⁵Maaron, yei niwatagh: Yo lolom igheen tsiei kat. Ulooŋ suŋuuŋ tsiei tane, ve utotoi tapirim ve uul ghei. Ugham mulin ghei pa pataŋani tane.

⁶Muuŋ, Maaron ileep nugh tooni patabuyaaŋ, ve isaav ighe: “Yau naparav le naliiv koiagŋa wa. Tauta tintinig ve navalagh taan Sekem ve nugh duduuŋa to Sukot, ve nareii irau tamtamon tsiau.

⁷Taan sirivu to Gileat, ve taan to yes Manase paam, ene yau tsiau. Rumei to yes Epraima timin hat ariaaŋa to napoon dabag pa malmal. Ve rumei to yes Yuda timin titi tau nakisi imin ilaal pa pooz tsiau.

⁸Taan sirivu to yes Moapa, ene imin oon tsiau to ririwaaŋ. Ve taan sirivu to yes Edoma, ene nugh tau nasik zuzuuŋa to agheg izala. Ve yes Pilistia, yau naparav tomani zi le naliiv zi. Tauta tintinig ve nasir.”