Mbouŋ to Yes Israela 59:7-14

⁷Ughita. Saveeŋ samsamia moghon to ivotvot ila avodi. Yamadi, nene inimale buza mata. Ve tisavsaav tighaze: “Sei pale ilooŋ ghei?”

⁸Eemoghon Yoova, yom ughita di, ve uŋiŋ padi. Yes ndug ndug to tiwatag ghom maau, yom uveleg di, ve ughaze tirau sa?

⁹Maaron, you naghamgham tapirig ilat tiom. Tovenen naghur matag payom, ve nasasaŋan moghon. Koiagŋa irau tigham mbeb eta payou maau. Pasa, yom upoon ghou padi unumale raŋ to izala kat.

¹⁰Maaron tiou, lolom ineep tuŋia ila to tamtoghon tiom ve uluul di. Yom pale unum toman ghou, ve utatan koiagŋa, ve naghita pa taug matag.

¹¹Eemoghon urab di timaat rikia malep. Upul di tineep toman pataŋani ris o. Leso tamtoghon tiou matadi kisin ŋgar tiom to ughurghur atia pa ndiran samsamiadi. Maaron, yom unum sigeu payei. Utatan di pa tapirim le tiwaghamgham, ve ureu mbirisan di.

¹²Pasa, saveeŋ to ivotvot ila avodi, poia maau. Moghon moghon avodi isosor. Yes tighamgham kaarom pa tamtoghon, ve tipipiyaav saveeŋ samsamia naol padi. Eemoghon ŋgar todi to tipapait taudi ve tiveleg ghom, nene pale inim liis padi.

¹³Tovenen upatooŋ mbalmbali tiom padi, ve uwaghamun di. Maaron, upasob di le tisob kat. Leso tamtoghon irau taan dige to naol ne, tighilaal ghom tighaze yom ughamgham pooz pa yei to Yakop papaghu toni ne.

¹⁴Rabrab to naol ne, koiagŋa tinimnim, ve tilaghlaagh ila ndug lolo. Tiŋaaŋ mareer, ve lolodi ŋurŋuria tinimale ŋgavuun to ighaze ighan tamtoghon.