Mbouŋ To Yes Israela 51:8-19

⁸Yau naghe nalooŋ ghom usaav ughe yo ureu sosor tsiau wa. Leso tintinig ve lolog poia muul. Yo ughur pataŋani tiina kat iŋarui ghau pa sosor tsiau. Uul ghau, leso tintinig muul.

⁹Ŋgar tsiau naol tau isosor pa eez tsio na, matam ila pani muul sov. Ureu sosor tsiau isov ilale.

¹⁰Maaron, ugham ŋgar ŋgalaaŋa ivot ila lolog, ve upalot ghau. Leso nayooz tuŋia muul ve nataghon duduŋai ŋgar tsio.

¹¹Uziir ghau pa naghom sov. Ve usan Avuvum Patabuyaaŋ ighau payau sov.

¹²Muuŋ, yo ugham mulin ghau le lolog poia kat. Aazne, naghe ugham tauvene payau muul. Upaburigin ghau, leso matag loŋloŋai payo irau saawe.

¹³Ighe ugham tauvene, yau aat napaduduuŋ yes tau tizorzoor aliŋam, ve yes tau tighamgham sosor na, pale titoor ŋgar toozi imuul ilat payo.

¹⁴Maaron, sosor tsiau to naliŋ siŋ, ene tiina kat. Irau to namaat pani. Eemon yo Maaron tsiau ve Uleeŋa tsiau. Tauvene ugham mulin ghau, ve ureu sosor tsiau ilale. Leso lolog poia kat, ve nambou toman aliŋag tiina, ve napait ezam pa ŋgar tsio duduuŋa.

¹⁵Yau mayag pa sosor tsiau, ve naneneeŋ mon. Tauvene ureu sosor tsiau ilale. Leso avog pakia, ve napait ezam.

¹⁶Maaron, yo lolom pa nagham ŋgai imin watooŋrau payo mako. Watooŋrau tau yav ighan dodolini na paam. Imin ta igham ghom lolom poia, kanaŋ naghamu. Eemon yo lolom pa ŋgar tauvene kat mako.

¹⁷Watooŋrau tau yo lolom pani na, ene tauvene: Yau aat natatan taug, ve lolog ipataŋan pa sosor tsiau. Ene watooŋrau tauu. Tamtamon tau ighe itatan tauu, ve loolo ipataŋan pa sosor tooni, ene yo irau ughur murim pani mako.

¹⁸Maaron, ugham poghania nugh Zion itaghon taum lolom. Ugharaat mulin didiiŋ ariaaŋa tau ilivut Yerusalem na, le izaa iyooz muul.

¹⁹Leso nigham watooŋrau tau iduduuŋ ila yo matam. Pale niyau makau tilam, ve nighur zi izala artaal tsio ve yav ighan dodolin zi. Leso ughita ve lolom poia kat.