Mbouŋ To Yes Israela 42:5-10

⁵Tauta naghason taug naghe mindai ta aazne lolog isaghat? Lolog ipataŋan ve nagham ŋgar naol pasaa? Yau aat naghur ila to Maaron ariaaŋ, ve naghur matag pani. Pasaa, i Maaron tsiau ve Uleeŋa tsiau. Tauvene yau aat napaiti muul.

⁶Onoon, aazne lolog ipataŋan kat, ve napasawal payo. Pasaa, naleep nagharau ghom mako. Yau naleep izi yaa Yordan daaba tau igheen izi loloz Ermon ziige tau ila pa loloz Mizar. Eemon yau aat matag iŋgal imuul ila pa ŋgar tsio.

⁷Pataŋani tau yo upuli ivot payau ne, ene itatan ghau kat. Ene imin yaa tau irereer toman luutu tiina na, iyatyaat izala pavog ve imbelmbeluut ghau. Ve imin dibom tintiina to mazavan tipolpol izala pavog.

⁸Eemon mataaz ta naol ne, Yoova loolo isaghav ghau ve iuluul ghau. Tauvene mboŋ ta naol, yau namboumbou to napakuru. Suŋŋuuŋ tsiau iŋaŋarui Maaron. Pasaa, i ta iŋgin lepoogh tsiau.

⁹Maaron, i Volaaŋa tsiau ariaaŋa. I iponpoon ghau imin maetaaz tau izala kat. Tauvene naghasoni naghe: “Puughu mindai ta lolom iveegh payau? Mindai ta upul koiagŋa titatan ghau, ve tigham ghau lolog isaghat?”

¹⁰Saawe isov koiagŋa tisasavia saveeŋ veleghiiŋ payau. Ve tinoknok ghasoniiŋ ghau tighe: “Maaron tsio ileep sindei?” Saveeŋ toozi tawe iŋgalŋgal ghau imin iiz.