Mbouŋ To Yes Israela 37:11-30

¹¹Eemon yes tau titatan tauzi ezazi ve tinumeer Yoova, yes pale tileep poia ila taan tau i igham pa tamtamon tooni. I pale igham zi tileep poia kat toman tintinizi.

¹²Zeran sasaghati tilup zi ve tiil eez to tivaghamunia tamtamon duduŋazi. Atezi yavyav kat ve tiŋaaŋ maripazi ila pazi.

¹³Eemon Yoova, i iŋiŋ pazi. Pasaa, i iwatagh: Malau mako pale saawe toozi ivot gha tilalez.

¹⁴Zeran sasaghati tipas mbuzaagh toozi to tirav yes mbolaaŋa tau tirau gabua eta mako na. Ve tidaad paneegh toozi to tivanegh zi. Tighe tirav yes tau titaghon eez duduuŋa na.

¹⁵Eemon Yoova pale ipamuul mbuzaagh toozi imuul pa tauzi. Ve paneegh toozi pale ipolpol.

¹⁶Isaav ighe tamtamon duduuŋa eta le gabua ŋgiira mon, ene irau. Lepoogh tooni pale poia iliiv zeran sasaghati naol tau lezi gabua katini.

¹⁷Pasaa, Yoova pale ipasov zeran sasaghati tapirizi. Eemon i ipapalot tamtamon duduŋazi, ve iŋgin zi tileep poi.

¹⁸Yes tau lezi sosor ila Maaron maata mako na, Yoova iwatagh lepoogh toozi, ve maata pazi. Ve gabua tau i igham pazi motot na, ene pale igheen toozi taghon taghon gha ila.

¹⁹Saawe tau ighe pataŋani ivot, yes pale tileep poi. Isaav ighe pitool ivot, ene pale tirau kat pa aniiŋ.

²⁰Eemon zeran sasaghati pale tisov tilalez. Yoova koiŋa pale timatmaat imin manman ruuŋgu tau timalai ve timburur tizi. Pale tisov imin yav mbuasa tau imbuŋ izaa, ve imbiriis gha ilale.

²¹Zeran sasaghati tighamgham bun, ve tiyatu mako. Eemon tamtamon duduŋazi, yes tireirei gabua toozi pa yes mbolaaŋa.

²²Yes tau poia to Yoova izazaa toozi na, pale tileep poia ila taan tau i igham pa tamtamon tooni. Eemon yes tau aatyavyav tooni igheen toozi na, i pale ipasov zi gha tilalez.

²³Yes tau titaghon eez to Yoova na, tighamu loolo poia kat. Ve i pale itotoi eez pazi, ve ipalot zi pa laghooŋ toozi.

²⁴Tamtamon tauvene, isaav ighe aaghe ilot pa gabua eta, ene irau itap mako. Pasaa, Yoova ikiskis niima ve ipapaloti.

²⁵Saawe tau yau kukuag gha ilam aazne namin kooŋ ne, yau naghita Yoova ighur muuri pa tamtamon duduŋazi pai eta soone. Ve naghita toozi eta naatu pitoola, ve isuŋsuŋ tamtamon pa le aniiŋ soone.

²⁶Tamtamon duduŋazi matazi reiŋ gabua, ve tiyokyok pa tamtamon to tigham bun ila toozi. Ve natuzŋa paam timin eez to tamazŋa tighita poia to Yoova izaa to tamtamon.

²⁷Ughur murim pa ŋgar saghati, ve ugham ŋgar poia mon. Leso uleep poi ila taan tau Yoova igham payo na taghon taghon gha ila.

²⁸Pasaa, Yoova loolo pa ŋgar duduuŋa. Tauvene tamtamon tooni tau lolozi isaghavu ariaaŋ ve titaghon eez tooni na, i irau ighur muuri pazi mako. I pale iŋgin poghani zi taghon taghon gha ila. Eemon zeran sasaghati natuzŋa, i pale ipasov zi gha tilalez.

²⁹Zeran duduŋazi pale tigham taan tau Yoova igham pa tamtamon tooni na, ve tileep poia ta sewe irau saawe.

³⁰Saveeŋ tau ivotvot ila tamtamon duduŋazi avozi, ene ŋgar poia igheen ila. Yes tisasavia ŋgar duduuŋa mon.