Mbouŋ To Yes Israela 36:1-12

¹Mbouŋ to David, besooŋa to Yoova Ŋgar to zoraaŋ Maaron aliiŋa tau igheen ila zeran sasaghati lolozi, ene isavsaav pazi, ve ighamgham pooz pazi. Tauta matazi iŋgal Maaron mako, ve tiroi pani mako.

²Sosor toozi tawe, ikau ŋgar toozi. Tauta tipapakur tauzi, ve matazi iŋgal sorok tighe Maaron ighita sosor toozi mako, ve irau ighur atuya pazi mako.

³Saveeŋ karom ve saveeŋ sasaghati mon ta ivotvot ila avozi. Ŋgar tau iuul ghiit to taleep poia, ene tipuli wa. Tauta tigham ŋgar poia eta mako.

⁴Ŋgar toozi iyaryaaŋ kat. Tighe le tigham ŋgar saghati mon. Mboŋ ta naol ne, tighengheen ila moogh toozi, ve matazi iŋgalŋgal pa saa ŋgar saghati tau pale tighamu. Eez saghati tawe, lolozi pa tipuli mako.

⁵Yoova, yo lolom isaghav tamtamon tsio, ve uluul zi irau saawe. Ŋgar tsio tana, ene tiina le tiina kat. Izala le ikis sambam saamba. Ve ŋgar to taghoniiŋ saveeŋ mbuaaŋ tsio paam. Izala le ikis taitai.

⁶Ŋgar tsio duduuŋa, ene imin loloz tintiina. Ve ŋgar tsio tau ugabiiz tamtamon itaghon ŋgar duduuŋa ve ughur atuya pazi, ene paam tiina kat, imin mazavan belbeluuŋa tau izila le izila kat. Yoova, yo uŋgin tamtamon ve gabua maata maata to su ve nughei, ve uluul zi, tauta tileep poi.

⁷Maaron, gabuam tau lolom isaghav tamtamon tsio ariaaŋ ve uluul zi, ene gabua tauu. Tamtamon tisov tiyooŋ ila nimam saamba, imin tatareek natŋa tiyooŋ ila tinazi baage saamba.

⁸Rumei tsio, ene ivon pa gabua popoia maata maata. Tauvene tamtamon tighan le isooŋ zi. Poia tsio izazaa toozi imin yaa tiina tau irereer. Yo upaghun zi pani, ve tiyamaana poia kat.

⁹Yo ta umin puughu pa gabua naol isov tau tileep matazi yaryaare. Ve ghazooŋa tsio isul ghei, tauta matamai ighazooŋ.

¹⁰Yoova, lolom isaghav yes tau tiwatagh ghom. Yes tau ŋgar duduuŋa igheen ariaaŋ ila lolozi na, utotoi poia tsio pazi, ve uul zi itaghon ŋgar tsio duduuŋa.

¹¹Tauvene yes tau tipapait tauzi ezazi ve tivelegh tamtamon tsio na, upul zi titatan ghau sov. Ve upul zeran sasaghati tinaan ghau sov.

¹²Aghita. Yes tau tinoknok ghamuuŋ ŋgar saghati, tauta Maaron irav zi titaptap tizi, le patazi tivaghengheen izala taan paavo. Irau tiburig muul mako.