Mbouŋ to Yes Israela 35:2-13

²Undud ghom pa mburuguuŋ tiom to malmal, ve ukis sigeu tiom, ve umundig unum uul ghou.

³Upas iiz ve ndaab tiom, ve upoon ghou pa yes to tigham lilin ghou. You naghaze nalooŋ ghom usaav payou ughaze: “You Volaaŋa tiom. You pale nauul ghom.”

⁴Yoova, yes to tighaze tirab ghou namaat, utatan tapiridi, ve ugham di mayadi ve tighau tila. Yes to tikaal ataam pa tiwaghamun ghou, ugham ŋgar todi iwaghamgham, ve timuul tila toman mayadi.

⁵Yoova, naghaze aŋela tiom inaan di ve tighau tila, inimale yaghur iviviir ghavuur.

⁶Aŋela tiom igham taghon di, ve tilaan ila ndoroom lolo taghon ataam to kirikirikia, ghoro poia.

⁷Pasa, you nagham sosor eta padi maau. Eemoghon yes tiraar malum tighaze tisavag ghou. Ve titai saambu to izila kat, leso natap nazila.

⁸Yoova, ukarmotin di pa pataŋani tiina eta. Ugham di tiŋgud malum to tiraara payou ne. Ve ugham di titaptap tizila saambu to titaii payou. Leso tigham samia!

⁹Yoova, ighaze ugham tovene, nene pale lolog poia kat payom, ve tinig iza pa ulaaŋ to ugham payou.

¹⁰You pale napakur izam toman lolog, ve naghaze: “Yoova, sei to inimale yom? Eta maau! Pasa, yes to tapiridi maau, yom ugham mulin di ila yes to tapiridi tintina ne nimadi. Yes mbolaaŋa ve yes to tineep ila pataŋani lolo, yom pale uvool todi, ve ugham mulin di ila yes yubyubŋa nimadi.”

¹¹Tamtoghon naol timundig ve tiŋgal saveeŋ kaarom payou tighaze tiwaghamun ghou. Eemoghon saveeŋ ŋgaliiŋ to tinoknok ghasoniiŋ ghou pani, you nakankaan pani.

¹²You nagham ŋgar poia padi. Eemoghon yes tipamuul ŋgar samia payou. Tauto lolog ipataŋan kat.

¹³Eemoghon sawa to yes timorooŋ le tisami, lolog ipataŋan padi, ve nagharaat taug maau. Ve naŋgun taug pa ghaniiŋ aniiŋ, ve naghur di tila suŋuuŋ tiou. Eemoghon suŋuuŋ tiou tonene, yom ugham anoŋa ivot maau. Tauto lolog ipataŋan kat, ve nataŋ padi inimale nditag, ma toŋvetaz tiou kat. Ve nalaagh matag iza maau. Natudtud ve nataŋtaŋ nanimale ŋgeu to lolo ipataŋan pa tiina imaat.