Mbouŋ To Yes Israela 33:1-22

¹Yam tau ataghon ŋgar duduuŋa na, lolomim poia pa Yoova, ve ayoor eeza toman aliŋamim tiina. Yam tau aghamgham ŋgar poia na, apait Yoova eeza, o iduduuŋ.

²Arav ambam ve gita, ve apakur Yoova. Arav gabua maata maata, ve apaiti ila mbouŋ tau aliiŋa poia na.

³Ambou mbouŋ paaghu pani, ve arav poghania ambam ve gita. Leso mbouŋ tsiam paghuuna. Ambou tiina, ve apaiti toman lolomim poia!

⁴Pa saveeŋ to Yoova, ene onoon ve iduduuŋ mon. Uraat naol tau ighamgham zi na, ene itotoia ighe i itataghon saveeŋ mbuaaŋ tooni.

⁵I loolo pa ŋgar duduuŋa ve ŋgar to gharatooŋ pataŋani to tamtamon le iduduuŋ. Ve loolo isaghav tamtamon tooni ariaaŋ ve iuluul zi. Ŋgar tane, i itotoia irau taan isov.

⁶Muuŋ, saveeŋ to Yoova mon, tauta gabua to sambam saamba tisov tivot. Aavo isaav, ve aaz, kaiyo, ve pitum tisov tivot ila sambam saamba.

⁷I igham te ila ilup ghi ila niia eemon. Mazavan tau muuŋ geeg itav taan na, ene i ighur poghania ila niia.

⁸Yam tau aleep irau taan na, aroi pa Yoova ve ataghon ŋgar tooni. Yam nughmariŋ, aroi pani ve apakuru.

⁹Pa i isaav mon, ve sambam ve taan tivot itaghon i tauu aliiŋa. I isaav ariaaŋ, ve gabua tisov tivot ve tigheen tuŋia ila niazi niazi.

¹⁰Nugh nugh matazi iŋgal ŋgar katini tighe tigham zi. Eemon Yoova iponpoon eez pazi. Tauta ŋgar toozi tawe imin kaut sorok, ve le anooŋa mako.

¹¹Eemon Yoova, isaav ighe maata iŋgal ŋgar eta, ene pale ŋgar tana iyooz tauvene irau saawe. Saa ŋgar tau ighe loolo ighur pani, ene pale ighengheen tauvene taghon taghon gha ila.

¹²Yes Israela Maaron toozi, ene Yoova. Tauta tintinizi pa poia tooni tau izazaa toozi. I tauu isiigh zi, ve igham zi timin le motot.

¹³Yoova ileep izi sambam, ve maata izizi pa eval tiina to taan.

¹⁴I ileep ila niia to ghamuuŋ pooz, ve ighitghita tamtamon tisov tau tileep izi taan.

¹⁵I ta ighurghur ŋgar ila tamtamon eŋaeŋa lolozi. Ve ŋgar naol tau tamtamon tighamgham zi na, i iwatagh zi tisov.

¹⁶Isaav ighe kinik eta le zaaba katini, irau zaaba tana zigazi tiliiv pa malmal mako. Zaaba ariaŋazi paam. Irau tauzi tapirizi ve tiliiv koiazŋa mako.

¹⁷Ve hos tau zaaba tilandoov zi pa malmal na, tauvene paam. Isaav ighe tighur matazi pazi to tiuul zi ve tiliiv koiazŋa, ene aat tighur matazi pazi sorok. Onoon, hos tapirizi. Eemon irau tiuul zi mako.

¹⁸Onoon kat, yes tau tiroi pa Yoova ve titaghon ŋgar tooni na, i maata pazi. Yes tau tinumeer Yoova tighe i loolo isaghav tamtamon tooni ariaaŋ ve iuluul zi na, i iŋgin zi tileep poi.

¹⁹I iuluul zi, ve igham mulin zi pa pataŋani toozi. Leso tileep poi. Ve isaav ighe pitool tiina ivot, i aat iuul zi, ve igham lezi aniiŋ ve tileep poi.

²⁰Tauvene iit tanumeer Yoova ve taghur mataan pani. Pasaa, i Uleeŋa toit, ve imin sigheu pait.

²¹I mon, tauta loloon poia kat ve tintiniin. I patabuyaaŋ ve eeza tiina. Tauta taghur ila tooni ariaaŋ.

²²Yoova, yei nighur matamai payo to uul ghei. Ughur poia tsio izaa tsiei itaghon ŋgar tsio tau lolom isaghav tamtamon tsio ariaaŋ ve uluul zi.