Mbouŋ To Yes Israela 26:1-11

¹Mbouŋ to David O Yoova, yau naghe yo upaghazoŋai ghau ila tamtamon matazi ughe yau ŋeer duduŋag. Pasaa, laghooŋ tsiau, yau nataghon ŋgar duduuŋa mon. Ve naghur ilat tsio ariaaŋ. Lolog ruru payo mako.

²Yoova, ugabiiz ghau, ve utoov ghau. Utiir poghania lolog ve ŋgar tsiau, ve ughita: Naduduuŋ ila yo matam, ma mako?

³Monmon matag iŋgalŋgal ŋgar tsio tau lolom isaghav tamtamon tsio ariaaŋ ve uluul zi. Yo utaghon saveeŋ tsio irau saawe. Gabuam tana ipapalot ghau pa laghooŋ tsiau, tauta nataghon eez tsio.

⁴Yau yeŋa zeran karomŋa niluplup ghei mako. Yes tau tipamir tauzi pa ghuruuŋ ila toozi na, yau napaak zi mako.

⁵Yau naghur koi pa yes tau tighamgham ŋgar sasaghati, ve naleep soghan pazi. Isaav ighe zeran sasaghati tilup zi, ene irau naleep tomani zi mako.

⁶O Yoova, yau nataghon ŋgar duduuŋa mon. Tauta namin nimag, leso itotoi ighe yau leg sosor eta mako. Ve nalaagh livutin artaal tau tighamgham watooŋrau payo izala na, ve nasuŋsuŋ payo.

⁷Yau aat nambou mbouŋ toman lolog poia ve napait ghom, ve navotia uraat tsio ŋgeretazi tau maata ite kat na.

⁸Yoova, yau lolog pa rumei tsio kat. Pa ene niam to lepoogh. Yo utotoi tapirim ve mbonarim tomania poia tsio ivotvot ta sewe.

⁹Yes tau tisosor pa eez tsio na, upasov ghau tomani zi sov. Ve yes tau tiliŋliŋ siŋ pa tamtamon na, urav ghau namaat tomani zi sov.

¹⁰Zeran tauvene, nimazi igharghaar pa ghamuuŋ ŋgar sasaghati naol. Ve isaav ighe tighol zi to tigham ŋgar saghati eta, ene aat tiyok mon ve tighamu.

¹¹Eemon laghooŋ tsiau, yau nataghon ŋgar duduuŋa mon. O Yoova, yau besooŋa tsio. Lolom isaghatin ghau ve ugham mulin ghau.