Mbouŋ to Yes Israela 24:1-8

¹Taan toman mbeb tisob to tineep ila, nene to Yoova. Ndug tisob toman tamtoghon to tineep ila, nene toni moghon.

²Pasa, ye to ighur taan ipot izala te pogho. Ve ipariaaŋ taan pughu ineep tuŋia izila te lolo to sila kat we.

³Sei irau izala lolooz to Yoova ve isuŋ pani? Ve sei irau ilooŋ ila rumai toni patabuaŋ, ve iyoon ila mata?

⁴Tamtoghon tovene: Ye igham sosor eta maau. Ve ŋgar isob to ineep ila lolo, nene ŋgalaaŋa moghon. Ye ipait maaron kaaromŋa maau, ve iwaat Maaron iza sorok pa ipalot saveeŋ kaarom maau.

⁵Tamtoghon tovene, poia to Yoova pale iza toni. Maaron to Volaaŋa toni ne, pale igham mulini ve ineep pooi, ve ipatooŋa ighaze ye ŋgeu deŋia.

⁶Ndiran tovene tizuaria di pa Maaron. Yes tighaze tila tivot to Maaron to Yakop nagho, ve tisuŋ pani.

⁷O yam ataam, akaak ve tinimim iza. Yam ataam to muuŋ kat tigharaat gham, tinimim iza, ve akaak le akaak kat. Leso soso irau kinik to iza tiina pa tapiri ve poia toni, itaghoni ilooŋ ila.

⁸Laak, kinik to iza tiina pa tapiri ve poia toni, nene sei? Nene Yoova. Ye ariaŋa, ve tapiri tiina. Ve ye iraua kat pa malmal.