Mbouŋ To Yes Israela 21:4-12

⁴I ighason ghom to uŋgini poi ila saawe to malmal, leso imaat sov, ve ileep poia taghon taghon gha ila. Ve yo ulooŋ suŋuuŋ tooni.

⁵Yo uule gha iliiv malmal, tauta eeza ivot imin tiina. Ve upaboode pa tapirim ve poia tsio. Tauta vaaru ilaan irau nugh nugh, ve tamtamon tipaiti tighe i eeza tiina kat.

⁶Onoon kat, poia tsio pale izazaa tooni taghon taghon gha ila. Ve yo uleep tomania. Tauta loolo poia le poia kat.

⁷Kinik tsiei inumeer Yoova. Tauvene gabua eta irau ighamu itap ne mako. Pasaa, Maaron Tiina Tau Iliiv Zimaronŋa Tisov na, loolo isaghavu ariaaŋ, ve iuluule itaghon saveeŋ mbuaaŋ tooni.

⁸O kinik, nimam pale ikisiir koiamŋa tisov. Yes tau tighur koi payo na, nimam tapir pale isaghav zi.

⁹Saawe tau utotoi tapirim ivot ighazooŋ, yo pale uvaghamun zi kat imin yav tiina ighan gabua. Onoon kat, aatyavyav to Yoova pale izaa toozi, ve yav tooni ighaniir zi.

¹⁰Natuzŋa paam, yo pale uravuur zi, ve upasov zi pa taan. Tauvene murei, paaghu toozi eta irau ileep muul mako.

¹¹Onoon, yes tiil eez payo, ve timbu saveeŋ tighe tivaghamun ghom. Eemon ŋgar toozi saghati tawe irau ighur anooŋa mako.

¹²Saawe tau tighita yo ughur paneegh naatu iŋarui zi, yes pale tiroi ve tighau tila.