Mbouŋ to Yes Israela 16:1-11

¹O Maaron, unum sigeu payou ve uŋgin ghou naneep pooi. Pasa, you nanumeer ghom, ve nayooŋ ilat tiom.

²You nasaav pa Yoova: “Yom Tiina tiou. Ighaze naneep saguan payom, irau nandeeŋ mbeb poia eta maau.”

³Tamtoghon patabuaŋa to Yoova to tinepneep izi taan, yes popoiadi kat. Ighaze naneep toman di, yes tigham lolog poia le poia kat.

⁴Eemoghon ndiran to timbesmbees pa maaron kaaromŋa, pataŋani naol pale tiza todi. You irau nala toman di pa watooŋrau todi maau. Ve avog irau itut maaron todi izadi rita maau.

⁵You naghita Yoova naghaze ye inimale taan poia eez to tipuli payou pa naneep pani. Irau nambool pa mbeb eta maau. Pasa, you naneep ila ye nima.

⁶Mbeb naol to you nagham di ilat tiom, nene popoiadi moghon. Onoon kat, nepooŋ tiou to Yoova igham payou, nene poia kat, inimale naneep ila taan paghuna eez to tipuli payou.

⁷You napait Yoova pa poia toni. Pasa, ye ighamgham pooz payou leso nataghon ataam poia. Mboŋ paam, ŋgar to ye ighuri ila lolog ne, ipatooŋ ataam payou.

⁸Moghon moghon, matag iŋgalŋgal Yoova naghaze ye ineep toman ghou. Ye inepneep ila pa digeg waan ve ipapalot ghou. Tovenen mbeb eta irau igham ghou ruŋag iza ne maau.

⁹Tauto tinig iza, ve lolog poia kat. Irau namatughez maau. Pasa, yom pale uŋgin ghou naneep pooi.

¹⁰Irau upul murim payou, ve upul ghou namaat ve nazila ndug to mateeŋa ne maau. Pasa, you tamtoghon tiom. Lolog ineep tuŋia ilat tiom, ve nataghon ataam tiom. Irau upul patug imbuuz ila naal lolo ne maau.

¹¹Yom upatooŋ ataam to nepooŋ poia payou. Ighaze naneep toman ghom, nene pale lolog poia kat. Ighaze you naneep ila pa nimam waan, nene pale nayamaan poia tiom itaghoni taghoni gha ila.