Mbouŋ To Yes Israela 138:3-8

³Saawe tau nataŋ rarai ghom pa uleeŋ, yo ulooŋ suŋuuŋ tsiau, ve ugham tapirig ivot muul ve nayooz ariaaŋ.

⁴O Yoova, saveeŋ tau ivot ila avom na, kinik to taan tilooŋa wa. Tauvene pale tisov lolozi poia payo, ve tipait ghom.

⁵Pale timbou ve tipait ghom pa ŋgar tau yo ughamghamu na, ve tighe: “Yoova eeza tiina kat pa tapiri ve poia tooni.”

⁶Ene onoon. Yoova eeza tiina, ve ileep saaŋa kat. Eemon yes tau lezi ezazi mako na, i maata pazi ve iuluul zi. Ve yes tau tiveleghi ve tipapait tauzi ezazi na, irau tiyooŋ pani mako. I iwataghiir zi wa. Pasaa, i maata malaua.

⁷Isaav ighe pataŋani naol ilivut ghau, yo aat uul ghau naleep poi. Isaav ighe koiagŋa atezi yavyav payau kat, ve tighe tivaghamun ghau, ene nimam tapir pale irav zi, ve ugham mulin ghau ila nimazi.

⁸O Yoova, saa ŋgar tau lolom ughe ivot payau, ene aat ivot itaghon ŋgar tsio. Pasaa, yo lolom isaghav tamtamon tsio, ve uluul zi irau saawe. Tauvene ughur murim payau sov. Pasaa yau ene, yo nimam muuri.