Mboe 9:5-15

⁵Nu swe ketem malmalŋana ku pizin wal ta matan munŋan i, mi pambiriizi zin wal sananŋan ma timap lup. Nu mus zan ma imap kat. Tana tomtom sa ko ikam ŋgar pizin mini som.

⁶Pa nu kas koŋ koi bizin ma timap kat. Irao timaŋga mini na som. Mi kar kizin tomini, ta reege zin ma tila len. Tana tomtom matan mbiriizikaala kat zin.

⁷Yooba, ni imbotmbot se muriini mbolŋana, mi ikamam peeze ma alok.

⁸Mi ni ko itiiri wal boozomen ta timbotmbot su toono na, mi iur kadoono ndeeŋeŋana pizin. Mi uraata tana, ni ko ikam ma ikam kat. Pa ni ndeeŋeŋana.

⁹Zin wal ta so kan koi bizin tikototo zin mi tikamam pataŋana pizin, na Yooba ko iwit zin, mi iur zin sala kor. Ni ko iwe seraara pa kan koi bizin. Naso kan koi bizin tirao be timbuulu zin mini som.

¹⁰Yooba, zin wal tau tiute katu, nako tipase pu. Pa zin wal tau tikam kinkiini be tiute u mi timbot kolouŋana pu na, nu rao pizil ndemem pizin na som.

¹¹Kapakur Yooba zaana! Pa ni imbotmbot su kar Sion mi ikamam peeze. Uraata ta ni ikamam na, kosoyaara uruunu pa zin karkari ta boozomen!

¹²Ni ipokotkot siŋ kizin tomtom. Tana zin wal ta so timbot raama pataŋana, na ni mataana iŋgalŋgal zin. Irao ipumun talŋaana pa tiŋiizi kizin na som.

¹³Yooba, re! Iŋgi koŋ koi bizin tiseseeze motoŋ ma aŋbotmbot naala kezeene i. Mi nio mbesooŋo ku tau. Tana muŋai yo mi tatke yo pa pataŋana taiŋgi.

¹⁴Naso aŋmender la iwal biibi ki Yerusalem matan, mi aŋsoyaara urum pa ulaaŋa biibi ta kam pio na, mi aŋpakur zom raama menmeen yo biibi.

¹⁵Wal matan munŋan tikel naala, mi tiŋgun kulumbo be tikam zin tomtom. Tamen zitun titop sula sumbuunu kizin tana. Mi kilis ta tiur pa wal pakan na, ikam zitun.