Mboe 96:1-11

¹Kombo mboe popoŋana pa Yooba! Niom tomtom ta karao pa toono ta boozomen na, kombo mboe pa Yooba.

²Kombo mboe pini mi kapakur zaana pa kampeŋana kini. Aigule ta boozomen kozzoyaryaara uruunu ambaiŋana pa uraata biibi ta ni ikamam be iuulu iti.

³Kosoyaara zaana biibi pizin karkari ta boozomen. Koso zin tomtom ta munŋaana men pa uraata kini bibip ta ipa ndel kat.

⁴Pa Yooba, ni ta biibi ŋonoono. Tanata tiwidit uruunu ma isala kor kat. Ni ilip pa merere ta boozomen. Tana iti tomototo i mi teleŋleŋ la kalŋaana.

⁵Zin karkari, merere kizin ta boozomen na, pakaamŋan men. Mi Yooba, ni Anutu ŋonoono ta iur saamba raama ka koroŋ ta boozomen.

⁶Ni zaanaŋana mi king biibi ŋonoono. Mi ni mbura keskeezeŋana mi ndabokŋana kat. Sombe telela urum kini mi tombot su kereene uunu, to tikilaala ta kembei.

⁷Tana niom karkari ta boozomen, kapakur Yooba. Kewe kwoono mi kapakuri pa zaana biibi mi mburaana.

⁸Kapakuri pa zaana biibi kat. Mi kelela urum kini raama patoronŋana tiom be kakam pini.

⁹Kelek kumbuyom mi kutuundu pa Yooba. Pa ni potomŋana mi ndabokŋana kat. Tana niom tomtom ta karao pa toono ta boozomen na, sombe kombot su kereene uunu, na kokoto ituyom, mi komoto i mi keleŋ la kalŋaana.

¹⁰Koso ma irao karkari ta boozomen ta kembei: “Yooba, ni king biibi ŋonoono ta ikamam peeze pa koroŋ ta munŋaana men! Muŋgu ni iur toono ma uunu imbol kat. Tana kosa sa irao be ikam toono ma imuzik mini na som. Mi ni ko itiiri zin karkari ta boozomen mi iur kadoono pizin. Mi kadoono tabe ikam pizin i, ko indeeŋe men.

¹¹Niom koroŋ ta kombot saamba mi toono na, niom ta boozomen leleyom ambai mi menmeen yom. Mi tai ramaki ka koroŋ matakiŋa ta boozomen tomini, kalŋoyom isala ma biibi kat.