Mboe 95:3-10

³Pa Yooba, ni ta Anutu biibi ŋonoono, mi king biibi ŋonoono. Ilip pa merere ta boozomen.

⁴Ni imborro koroŋ ta boozomen ta irao toono ma ila. Toono ta imbot meleeba kat ma ila isala abal ute ŋgutŋguutuŋan na, katuunu ta ni.

⁵Tai mi toono na, koroŋ kini men tau. Pa ni itunu ta iur zin. Mi itunu mburaana ta ikam ma toono raraazaŋana ipet.

⁶Kamar tusuŋ mi tutuundu pa Yooba. Telek kumbundu pini mi tapakuri. Pa ni ta iur iti.

⁷Ni Anutu kiti ta mataana piti mi imborro iti. Mi iti na, sipsip kini tau. Koozi keleŋ kat Yooba kalŋaana. Iso ta kembei:

⁸“Keleŋtut sua pepe. Kokena ŋgar tiom imbol mi kakam zooroŋana kembei ta muŋgu tumbuyom bizin tikam su lele bilimŋana ki Meriba mi Masa na.

⁹Indeeŋe tana, titoombo mburoŋ. Pa nio aŋbelmbel uraata bibip pizin, mi zin tire kat mburoŋ pa matan. Tamen tinoknok zooroŋana, mi tikam kinkiini be tire mini.

¹⁰Tabe tikam ma leleŋ pizin risa som pa ndaama tomtooru. Mi aŋso pizin ta kembei: ‘Wal tina, tiute zaala tio som, mi gorgori lelen imbotmbot molo pio.’