Mboe 88:5-16

⁵Iŋgi tizem yo ma aŋbombooreŋ sorok kembei ta zin wal meeteŋan. Nio kembei zin wal ta tikas zin ma timetmeete, mi tipiri zin sula naala, mi nu motom iŋgalŋgal zin mini som, mi kampe zin mini som.

⁶Nu ur yo sula kat naala ta usomŋana i, mi zugut biibi ilol yo.

⁷Ketem malmalŋana ku, ta ikoto yo, mi ilol yo kembei ta duubu biibi ipol ma isalakaala yo.

⁸Nu kam ma waeŋ bizin timbotmbot molo pio. Mbulu ta kam pio i, ina ikam ma wal tio timototo mi lelen be tire yo risa som. Iŋgi kembei aŋbotmbot lela ruumu sanaana, mi leŋ zaala sa tabe aŋyooto pa na som.

⁹Tana pataŋana tiŋgi ikam yo ma mburoŋ imap kat. O Yooba, aigule ta boozomen nio aŋwidit nomoŋ isala kor, mi aŋtaŋroro u be uulu yo.

¹⁰Lak, nu tooro mos sa pizin wal meeteŋan ma tire? Mi parei? Zin wal zanŋan ta timetmeete kek na, kizin tasa irao imaŋga ma ipakur zom? Som.

¹¹Zin wal ta timbotmbot sula naala na, tizzo sua pa mbulu ku ta urur lelem pa wal ku mi muŋaiŋai zin? Zin Andewa kan tizzo pa mbulu ku ta toto sua ku mbukŋana? Som.

¹²Zin wal ta timbotmbot la zugut leleene na, tiute mos ku bibip? Mi zin wal ta timbotmbot la meeteŋan murin mi tomtom matan mbeleele kat zin na, zin matan iŋgalŋgal mbulu ku ndeeŋeŋana? Som kat!

¹³Mi nio na, tiŋiizi tio imama ku be uulu yo. O Yooba, aigule ta boozomen, zoŋ ise na, aŋmaŋgaŋga pa muriŋ mi suŋŋana tio imama ku.

¹⁴Yooba, parei ta nu pizil ndemem pio, mi turke motom pio?

¹⁵Indeeŋe ta nio naŋgaŋŋoŋ mi imar na, aŋbadbaada pataŋana mi aŋbotmbot la naala kezeene. Pa nu seseeze kat motoŋ mi pamototo yo ma kembei ta kom koi ta nio i. Tana leŋ zaala sa mini som.

¹⁶Pa ketem malmalŋana ku ta ilol yo kek. Koroŋ sananŋan ta nu ur be tipasaana yo na, tikam yo ma aŋmoto ma aŋsaana kat.