Mboe 78:3-12

³Mbol ta iŋgi be aŋso i, tumbundu bizin tipit piam ma amleŋ, tanata amute.

⁴Muŋgu Yooba izzwe mburaana ma iwedet mat. Ni itortooro mos mburanŋan boozo, mi ikamam uraata bibip. Tanata tomtom tipakurkuri. Mi uraata kini tana, iti irao tawatkaala pa lutundu bizin na pepe. Bela tozzoyaryaara. Naso popoŋana kiti tabe tipet pa kaimer i tileŋ tomini.

⁵Zaala tabe wal kini tito bekena ni ziŋan tiparlup zin ma tiwe tamen na, muŋgu Yooba iswe pa tumbundu bizin, ta popoŋana ki Yakop na. Ni iso zin Israel pa sua kini. Mi iur sua pa tumbundu bizin be zin kadoono tipaute lutun bizin pa sua tana.

⁶Naso zin tomini tileŋ, tona zin kadoono tipaute lutun bizin, mi iseeŋge iseeŋge ma ila.

⁷Mi popoŋana kizin ko tipase pa Anutu, mi matan iŋgalŋgal uraata ta ni ikamam na, mi titoto tutu kini.

⁸Kokena tikam kembei ta tumbun bizin. Pa tumbun bizin na, wal zorzooroŋan kat. Titoto Anutu leleene som, mi tiurur kat lelen pini som, mi titoto sua ta timbuk pini na som.

⁹Zin popoŋana ki Eparaim na, len peene ambaimbaiŋan be tikam malmal pa. Tamen indeeŋe ta malmal ipet na, zin tiko ma tila len.

¹⁰Mi sua ta ziŋan Anutu timbuk na, titoto som. Mi tipa pai kizin ma indeeŋe pa tutu kini som.

¹¹Mi matan mbeleele uraata ta muŋgu Anutu ikamam pizin na. Mos bibip ta ni ikam la matan ma tire kat na, matan iŋgalŋgal som.

¹²Indeeŋe ta tumbun bizin timbotmbot Aikuptu na, Anutu itooro mos bibip su lele keteeneŋana ki Zoan mi zin tire kat pa matan.