Mboe 77:4-18

⁴Mbeŋ na, aŋkennekaala motoŋ risa som. Mi leleŋ ipata kat ma irao aŋso sua som.

⁵Pa ŋgar tio imilmiili pa mbulu ta muŋgu Anutu ikamam pa wal kini na. Motoŋ lala pa ndaama ndaama ta ni iuluulu zin.

⁶Tana mbeŋ na, aŋbombo mboe, mi aŋkamam ŋgar la leleŋ mi aŋrru pataŋana taiŋgi ka uunu.

⁷Parei, ko Merere ipizil ndemeene piam, mi ambotmbot ta kembei ma alok? Irao leleene imiili piam mini som?

⁸Mbulu kini ta itoto sua kini mbukŋana mi iurur leleene pa wal kini na, imap kek? Sua ta muŋgu imbuk piam na, ko itop ma iwe koroŋ sorok?

⁹Parei, iŋgi Anutu mataana mbeleele kampeŋana kini, mi kete malmalŋana kini iyembut muŋaiŋana kini?

¹⁰Tana aŋso pa ituŋ ma aŋso: “Iŋgi Anutu itooro ŋgar kini kek, tanata mburaana iporoukalkaala yam mini som.” Uunu tiŋgi tabe ikam ma leleŋ ipata kat.

¹¹Pa Yooba, nio motoŋ iŋgalŋgal uraata ku. Motoŋ imilmiili pa mos bibip ta muŋgu nu tortooro na.

¹²Nio aŋkamam ŋgar pa uraata ku ta boozomen, mi motoŋ lala pa mos mburanŋan ta muŋgu kamam na.

¹³O Anutu, nu kamam mbulu potomŋana men. Mbulu ku ipa ndel kat. Mi Anutu toro sa zaana biibi kembei ta nu na som.

¹⁴Nu Anutu ta tortooro mos bibip. Nu zzwe mburom pizin karkari ma tire kat.

¹⁵Zin wal ku ta Yakop mi Yosep popoŋana kizin na, itum mburom, ta itatke zin pa pataŋana kizin.

¹⁶O Anutu, indeeŋe ta yok bibip tire u na, motoŋana ikam zin. Mi tai ta imbot sula kat ta maaŋga na, imoto tomini. Tabe ikam uraata ma ka mbelut ise.

¹⁷Mi lele igabgap, mi iswiri yaŋ isu toono. Mi lele ikuruŋruŋ, mi ikimitmit, mi lolo niini iwenweene ma imiyaryaara.

¹⁸Nu kam ma miiri napiu itoogo, mi lele ikuruŋ ma kalŋaana biibi, mi lele ikimitmit ma ka azuŋka iyaara pa toono. Mi nu toktok toono ma ilala imarmar.