Mboe 77:13-20

¹³O Anutu, nu kamam mbulu potomŋana men. Mbulu ku ipa ndel kat. Mi Anutu toro sa zaana biibi kembei ta nu na som.

¹⁴Nu Anutu ta tortooro mos bibip. Nu zzwe mburom pizin karkari ma tire kat.

¹⁵Zin wal ku ta Yakop mi Yosep popoŋana kizin na, itum mburom, ta itatke zin pa pataŋana kizin.

¹⁶O Anutu, indeeŋe ta yok bibip tire u na, motoŋana ikam zin. Mi tai ta imbot sula kat ta maaŋga na, imoto tomini. Tabe ikam uraata ma ka mbelut ise.

¹⁷Mi lele igabgap, mi iswiri yaŋ isu toono. Mi lele ikuruŋruŋ, mi ikimitmit, mi lolo niini iwenweene ma imiyaryaara.

¹⁸Nu kam ma miiri napiu itoogo, mi lele ikuruŋ ma kalŋaana biibi, mi lele ikimitmit ma ka azuŋka iyaara pa toono. Mi nu toktok toono ma ilala imarmar.

¹⁹Mi zaala ku ipa tai leleene. Tai ta mburaana biibi na, nu peete, mi imet ma iwe ru. Mi pa ma la na, tomtom sa ire kumbum muriini som.

²⁰Mi nu muŋmuuŋgu pa wal ku kembei ta mboroŋan kizin sipsip. Mi ur Mose ziru Aron ma tikam ruŋgum, mi tiyaaru zin Israel ma tila.