Mboe 76:1-5

¹Mboe ki Asap Zin Yudea kan tiute Anutu. Mi wal kini Israel tipakuri pa zaana biibi.

²Beeze ki Anutu imbotmbot Yerusalem. Pa muriini ŋonoono ta abal Sion.

³Indeeŋe ka koi bizin timaŋga pini su lele tana na, ni isebogboogo buza kizin mi peene kizin lutunlutun ta you ikanan la i, mi ipetepaala siŋgiao kizin. Tana mburu kizin boozomen ta malmal kana i, na ni ipasaana lup.

⁴O Anutu, nu mbotmbot lela azuŋka biibi leleene, mi nu ta biibi ŋonoono. Pa nu ndabokŋom kat mi mburom keskeezeŋom. Nu lip pa zin abal ta aliŋgumoraŋan.

⁵Kom koi bizin na, wal mburanŋan mi lelen imet kat. Mi nu porou ma lip pizin, tabe wal ku tila mi tiyo len mburu kizin malmal kana ma imap. Nu pun kom koi bizin ma tisu tiwe uri lup. Mi ko irao timaŋga mini na som. Malmal kan kizin na, wal mburanŋan. Tamen tirao be tikam kosa sa som.