Mboe 74:2-10

²Niam wal ta ambot lela lupŋana ku leleene na, wal ku ŋonoono. Pa muŋgu kat nu tatke tumbuyam bizin pa pataŋana kizin, mi kam zin ma tiwe lem. Tana motom iŋgal yam tomini. Mi motom ŋgal abal Sion. Pa ina, nu kam ma iwe itum murim be mbotmbot pa.

³Itum mar mi re lele ku ta isaana ma imbotmbot i. Koyam koi bizin tireege urum ku potomŋana ma isu lene, mi tipasaana lup.

⁴Lele ta muŋgu nu itiŋan taparluplup ti su pa i, ina kom koi bizin tikam ma iwe len. Mi kalŋan izalla, mi tipamender koroŋ kizin lela ma iwe kilalan kembei tilip piam kek.

⁵Mi tikam mbulu kembei zin wal ta tikam nakabasi kizin ma tila su be tikas ke.

⁶Pa ke ndabokbokŋan boozomen ta tisap koroŋ kunun ila be tipeŋgeeze urum ku na, tikam nakabasi mi tipetekatkat ma tisaana lup.

⁷Mi tiur you pa urum ku, mi ikan ma imap. Tana itum murim ta zom imbotmbot pa na, tipasaana ma isaana kat.

⁸Mi tisombe tikoto yam mi tipasaana kat yam. Tana lele boozomen ki toono ti ta amluplup yam su pa i be amzuŋzuŋ pu na, tiur you pa, mi ikan zin ma timap.

⁹Mi iŋgi amre kilalan sa kembei nu mbotmbot raama yam men i na som. Mi kwom sa imbot be iso yam pa ŋgar ku na som. Mi tomtom tiam sa iute som. Ko pataŋana ti imap ŋiizi?

¹⁰Anutu, iŋgi kom koi bizin tikamam seŋge pu, mi tirepilpiilu, mi tipasomsom zom. Parei, ko zem zin ma tinoknok ta kembei ma alok?