Mboe 73:2-18

²Nio ti, muŋgu kumbuŋ ikam ŋgiris, ma rimen mi aŋmel. Rimen ŋonoono mi aŋtop pa urlaŋana tio.

³Pa aŋre mboti kizin wal sananŋan ta nin izze mi tipakurkur zitun na, ambai komboono. Tabe ikam ma motoŋ mburmbur pizin.

⁴Pa zin na, titum ma kulin iŋgeeze, mi timbot ambai men ma irao meeteŋana kizin. Mi meeteŋana kizin tomini, tire yoyouŋana pa som.

⁵Pataŋana ki toono ta ikamam iti tomtom na, indeŋdeeŋe zin som. Zin len pataŋana sa som.

⁶Mbulu kizin ta tipakurkur zitun ma nin izze sorok, ina tipamaala pizin tomtom kembei ta natabu i. Mi mbulu kizin ta tikamam sorok malmal pizin tomtom mi tipasansaana zin, ina tiswe ma imbot kat mat, kembei ta mburu kizin mat kana.

⁷Tere zin na, keren indu. Pa tikam len mboti ambaiŋana kat. Tabe titum len ma tau! Mi ŋgar ki pakurŋana ta imbotmbot la lelen na, biibi ma ilip.

⁸Zin tirepilpiili zin tomtom, mi tiwirri sua sananŋana pizin. Mi tipakurkur zitun, mi tikototo zin tomtom pa sua kizin pamotoŋana.

⁹Wal tana tipakurkur zitun. Pa Anutu ta imbot saamba na, tipasansaana sua pini. Mi tiwirri sua sananŋana pizin tomtom ta timbotmbot toono na tomini.

¹⁰Tabe tikamam ma Anutu wal kini tomini, titoto zin, mi tikanan la kalŋan.

¹¹Mi tizzo ta kembei: “Aa, mbulu ta amkamam i, Anutu iute? Anutu kor kana, ni le ŋgar sa?”

¹²Kere kat kek? Wal sananŋan, mbulu kizin ta kembei. Len pataŋana sa som, mi tindoundou len koroŋ boozo.

¹³Muŋgu nio aŋkam ŋgar ŋoobo ta kembei, tana aŋso pa ituŋ ma aŋso: “Ŋonoono kat. Mbulu tio ambaiŋana, ina aŋkamam sorok. Parei ta motoŋ iŋgalŋgal ituŋ bekena leleŋ iŋgeeze, mi leŋ uunu sa isaana som?

¹⁴Mi iŋgi Anutu ikam yo ma aŋrre yoyouŋana pa mbeŋ ma aigule. Aigule ta boozomen, zoŋ ise na, ni iballis yo men.”

¹⁵Anutu, ŋgar tio sananŋana tana, sombe aŋswe ma ipet mat, so aŋpasaana zin wal ku, mi aŋpakankaana ŋgar kizin.

¹⁶Tana nio aŋkam ŋgar boozo kat pa mbulu ta iwedet pizin wal sananŋan, mi aŋrru ka ŋgar. Tamen aŋrao som. Pa ike pio. Tabe ikam ma leleŋ ipata kat.

¹⁷Kaimer aŋlela urum ki Anutu mi aŋsuŋ. To ŋgar tio ipet, mi aŋkilaala mbulu tabe ipet pizin wal sananŋan pa kaimer i.

¹⁸Ŋonoono kat, nu ko ur zin la zaala sipirpirŋana, bekena kam zin ma timelmel mi tipun kat zin.