Mboe 73:13-21

¹³Muŋgu nio aŋkam ŋgar ŋoobo ta kembei, tana aŋso pa ituŋ ma aŋso: “Ŋonoono kat. Mbulu tio ambaiŋana, ina aŋkamam sorok. Parei ta motoŋ iŋgalŋgal ituŋ bekena leleŋ iŋgeeze, mi leŋ uunu sa isaana som?

¹⁴Mi iŋgi Anutu ikam yo ma aŋrre yoyouŋana pa mbeŋ ma aigule. Aigule ta boozomen, zoŋ ise na, ni iballis yo men.”

¹⁵Anutu, ŋgar tio sananŋana tana, sombe aŋswe ma ipet mat, so aŋpasaana zin wal ku, mi aŋpakankaana ŋgar kizin.

¹⁶Tana nio aŋkam ŋgar boozo kat pa mbulu ta iwedet pizin wal sananŋan, mi aŋrru ka ŋgar. Tamen aŋrao som. Pa ike pio. Tabe ikam ma leleŋ ipata kat.

¹⁷Kaimer aŋlela urum ki Anutu mi aŋsuŋ. To ŋgar tio ipet, mi aŋkilaala mbulu tabe ipet pizin wal sananŋan pa kaimer i.

¹⁸Ŋonoono kat, nu ko ur zin la zaala sipirpirŋana, bekena kam zin ma timelmel mi tipun kat zin.

¹⁹Ko karau men mi pambiriizi zin. Ko yaŋgwiiri zin ma tila len. Tana tomtom ko tire mi timoto.

²⁰Merere, nu sombe maŋga mi pambiriizi zin, nako timap kat. Zin ko kembei koroŋ ta tere la miuŋana na. Sombe tamaŋga pa mankwoono na, imbiriizi ma ila ne kek.

²¹Indeeŋe ta motoŋ mburmbur, mi leleŋ iŋgis na, aŋkam kat ŋgar som. Nio aŋtalli pu kembei mbili ta le ŋgar somŋana i.