Mboe 72:2-13

²Sombe ikam peeze pizin wal ku, na uuli be ikam ma indeeŋe men. Mi pomboli be imender pizin wal ku ta timbot ŋoobo i, mi iurpe pataŋana kizin.

³Pa mbulu kini ndeeŋeŋana, ta ko iwe zaala pa lele ti be imbot ambai, mi ipiyooto mbulu luumuŋana.

⁴King tiam ko imender pizin wal sorrokŋan, mi iporou pizin. Mi zin wal ta timbot ŋoobo na, ni ko iuulu zin. Tamen zin wal ta tikototo zin sorrokŋan mi tikamam pataŋana pizin na, ni ko ikoto zin, mi iparamutmut zin ma mburan imap kat.

⁵Pombol king tiam be imbotmbot ambai men, mi iseeŋge iseeŋge ma ila, kembei ta zoŋ ma puulu i.

⁶Mi uuli be ikam kat peeze. Naso iuulu zin tomtom kembei yaŋ ta izzu pa mokleene mi ipembesmbeeze toono na.

⁷Mazwaana ta so ni ikamam peeze na, piyotyooto mbulu ndeeŋeŋana ma izze ma iwe biibi. Mi kam mbulu luumuŋana ma izze raama. Naso tomtom timbot ambai men, mi iseeŋge iseeŋge ma ila, kembei ta puulu i.

⁸King tiam ko ikam peeze pa lele ta biibi kat. Ka seŋgaaŋa su tai pakaana ta, mi ila ila ma imap su tai pakaana toro. Ko imaŋga su yok Euprates, mi ila ila ma irao toono ta boozomen.

⁹Ni ko ilip pa ka koi bizin. Tana zin ko timar mi tilek kumbun pini, mi timbilmbil su kereene uunu be leleene isaana pizin mi imuŋai zin.

¹⁰Zin king ki Tarsis ziŋan zin king ta timbot irao mutumutu ta boozomen, nako timar mi tikam le koroŋ ambaimbaiŋan pakan bekena tipakuri. Mi zin king ta timborro lele pakaana ki Sieba mi Seba na, zin tomini ko timar mi tikam koroŋ ambaimbaiŋan pini. Pa zin ko timbot la ni kopo mbarmaana tau.

¹¹Tana king ta munŋaana men ko tilek kumbun pini. Mi karkari ta boozomen ko timbesmbeeze pini.

¹²Pa zin wal ta len koroŋ som, mi zin wal sorrokŋan ta timbot ŋoobo mi len ulaaŋa sa som na, sombe titaŋroro i, na ni ko iuulu zin mi itatke zin pa pataŋana kizin.

¹³Zin wal tau len mburan biibi som, mi zin wal ta timbot ŋoobo mi tiru zalan na, ni ko leleene isaana pizin mi ikamke zin pa pataŋana kizin.