Mboe 72:14-19

¹⁴Tana sombe wal pakan tiurur pataŋana pizin mi tiseseeze matan, na ni ko imender pizin mi itatke zin la wal tana naman. Pa ni ko iur leleene pizin kembei toŋmatiziŋ kini ŋonoono. Tana irao igeede zin mi siŋin ireere sorok na som.

¹⁵Anutu ko ipombol king tiam be imbotmbot ma molo. Mi zin wal ki lele pakaana ki Sieba ko tikam le pat gol ta milmilŋana ma iŋgeeze kat. Mi aigule ta boozomen, zoŋ ise ma ila zoŋ isula na, wal kini ko tizuŋzuŋ Anutu be ipomboli, mibe ikampe i ma imbotmbot ambai men.

¹⁶Mai ambaiŋana ko ipet pa toono tiam. Ko ipet pa mokleene ta imbot sala abal uteene na tomini. Mi toono mbuyeene ko kembei ta abal Lebanon, mi ikam ma kini ambaimbaiŋan boozo ipet. Mi tomtom ta kembena. Kar ta boozomen ko timasak ma kan tomtom bizin tiwe boozomen kembei ta mbutmbuutu izaara ma ilol toono.

¹⁷King zaana biibi ko imbotmbot ma alok, kembei ta zoŋ i! Tomtom ko tiwidit uruunu, mi iseeŋge iseeŋge ma ila. Pa ni ta ko iwe zaala pa wal ta munŋaana men be kampeŋana ki Anutu ise kizin. Tana zin karkari ta boozomen ko tire kampeŋana ki Anutu ta imbotmbot se kini na, mi tipakurkuri.

¹⁸Tapakur Yooba! Ni Anutu kizin Israel! Pa ni itutamen ta ikamam uraata bibip ta ipa ndel kat.

¹⁹Tapakurkuri totomen! Pa ni zaana biibi mi mburaanaŋana. Ni ko iswe mbulu kini ndabokŋana mi zaana biibi ma irao toono ta boozomen. Ŋonoono ma ŋonoono kat!