Mboe 71:8-24

⁸Tana leleŋ ambai kat pu, mi kwoŋ ipakurkuru. Pa nu zom biibi mi ndabokŋom kat. Zoŋ ise ma ila zoŋ isula na, aŋwidit urum isala kor.

⁹Tamen iŋgi aŋwe kolman kek, mi mburoŋ izzu. Ziiri yo pa kerem uunu pepe, mi pizil ndemem pio pepe.

¹⁰Pa koŋ koi bizin tiluplup zin mi timburmbuuru koŋ be tipun yo ma aŋmeete. Mi tizaŋzaaŋa yo ma tizzo pio ta kembei:

¹¹“Aa, ni, Anutu ipizil ndemeene pini kek. Tamaŋga mi takami. Pa ni le tomtom sa be iuuli som.”

¹²Tana Anutu, mbot molo pio pepe! Anutu tio, loŋa mar mi uulu yo.

¹³Zin wal ta tiŋgalŋgal sorok sua pio na, pamiaŋ zin mi pun zin ma timap. Zin wal ta tisombe tipasaana yo na, koto zin mi pamiaŋ zin kat.

¹⁴Mi nio, nako aŋurur motoŋ pu mi aŋzza u be uulu yo. Mi ko aŋwidit urum totomen.

¹⁵Kwoŋ ko izzoyaryaara mbulu ku ndeeŋeŋana pizin tomtom. Zoŋ ise ma ila zoŋ isula, nako aŋzzo pa uraata bibip ta nu kamam pizin tomtom be uulu zin na. Uraata ku tana, sombe aŋtoombo be aŋnin, na aŋrao som.

¹⁶Yooba, nu kamam uraata bibip mi mburanŋan. Tana aŋwe kwom mi aŋsoyaara uraata ku tana pizin tomtom bekena matan iŋgal. Nio leleŋ be aŋzzo sua pa mbulu ku ndeeŋeŋana men.

¹⁷Indeeŋe ta nio naŋgaŋŋoŋ, mi imar indeeŋe koozi na, nu zzo yo pa mbulu ku. Tana aŋzzoyaryaara sua pa uraata ku bibip ta ipa ndel kat.

¹⁸O Anutu, iŋgi aŋwe kolman ma momo isala uteŋ kek. Mi pizil ndemem pio pepe! Mbotmbot raama yo ma irao aŋsoyaara mburom mi uraata ku bibip pizin popoŋana tiam tabe tipet pa kaimer i.

¹⁹Anutu, mbulu ku ndeeŋeŋana, ina ilip kat. Isala ma isala ta saamba a. Mi uraata ku ta kembena. Bibip mi mburanŋan. Tana nu kadom sa som. Som kat.

²⁰Ŋonoono, nu kam yam Israel ma amre pataŋana boozomen, mi seeze motoyam. Tamen nu ko kam yam ma ambot ambai mini. Iŋgi ambot naala kezeene i. Tamen nu ko tatke yam pa meeteŋana.

²¹Mi nio ta kembena. Nu ko pakur yo ma zoŋ iwe biibi mini. Mi potor leleŋ, mi kam ma leleŋ ambai.

²²Tonabe aŋse kombom mi aŋpakur zom. Pa nu toto sua ku mbukŋana. Anutu tio, nu Anutu potomŋana kizin Israel. Mbulu ku ipa ndel kat. Tana nio ko aŋse kombom tio mi aŋbo mboe be aŋwit zom.

²³Ko kalŋoŋ isala mi aŋbo mboe pakurŋana pu raama menmeen yo biibi. Leleŋ ko imap ipakuru. Pa nu ta kamke yo.

²⁴Tana aigule ta boozomen, zoŋ ise ma ila zoŋ isula na, nio ko aŋzzoyaryaara mbulu ku ndeeŋeŋana ta kamam pizin tomtom na. Pa zin wal ta tisombe tipasaana yo na, nu koto zin ma mburan imap, mi pimiili zin ma tila raama kan miaŋ.