Mboe 69:15-32

¹⁵Uulu yo: Kokena wo isur yo ma aŋla leŋ. Kamke yo: Kokena aŋmon sula mozo lukutuunu. Maata yo ma aŋse pa naala ta usomŋana i: Kokena toono ipol salakaala yo.

¹⁶Yooba, nu ambaiŋom. Nu toto sua ku mbukŋana mi urur lelem pa wal ku. Tana leŋ suŋŋana tio mi uulu yo. Muŋaiŋana ku na, biibi kat. Tana motom iŋgal yo mini.

¹⁷Nio mbesooŋo ku. Piŋgis motom pio pepe. Pa iŋgi aŋbot la pataŋana biibi kat leleene. Tana pekel kalŋoŋ karau men.

¹⁸Mar lae tio, mi uulu yo. Kamke yo pa koŋ koi bizin.

¹⁹Mbulu ta koŋ koi bizin tikamam pio, ina nu ute lup kek. Zin tirepilpiili yo, mi tipamiaŋ yo, mi tikototo yo.

²⁰Mi tipamiaŋ yo, mi tipasaana leleŋ ma isaana kat. Tana aŋso ko tomtom sa imar mi ipotor leleŋ. Mi som. Tomtom sa imar tio som.

²¹Indeeŋe ta petel yo na, titooro koŋ kini raama koroŋ pakpakŋana. Mi miri yo na, tikam koŋ yok pakpakŋana ma aŋwin.

²²Tana suŋŋana tio ima ku ta kembei: Mbalia ta kini kizin imbotmbot se na, ko iwe kembei ta napitpit pizin. Mi guraaba kizin ko tiwe kembei ta kilis pizin.

²³Kam zin ma matan ipis ma irao tire lele mini som. Mi pamoto zin kat ma riŋriŋ ikam zin.

²⁴Mbooro ta ketem malmalŋana imbot sula na, liŋ ma isalakaala zin be tiyamaana kat.

²⁵Kam ma lele kizin ta timbotmbot pa na, bilim. Tomtom sa ko ilela beeze kizin mini som.

²⁶Pa tomtom ta nu balisi kek na, zin tisu mi tiseeze mataana mini. Tomtom ta nu puni ma ire yoyouŋana na, zin tininin kao pini.

²⁷Wal tana sanaana kizin na, motom mbeleele pepe. Motom kiskis, mi pokot ma pokot kat! Muŋai zin risa pepe.

²⁸Mus zan pa ro ki mbotŋana mata yaryaaraŋana ma tila len. Sombe beede wal ndeeŋeŋan zan ise, na wal tana zan ila raama pepe.

²⁹O Anutu, iŋgi aŋbaada pataŋana mi aŋre yoyouŋana biibi. Mar mi uulu yo. Wit yo mi ur yo sala kor. Naso aŋbot ambai.

³⁰Nio ko aŋbo mboe mi aŋpakur Anutu zaana. Pa nio leleŋ ambai kat pini. Tana ko aŋwit uruunu ma isala kor!

³¹Pa mbulu ta kembei, Yooba ko leleene ambai pa ma ilip pa makau ta tikamam pa patoronŋana i.

³²Zin wal ta pataŋana ikam zin na, sombe tire Anutu iuulu yo, inako menmeen zin. Mi zin wal tau tikamam kinkiini be tiute kat Anutu mi timbot kolouŋana pini, nako tikam pombolŋana.