Mboe 66:5-12

⁵Kamar mi kere uraata bibip ta Anutu ikam la tomtom mazwan. Uraata tana iswe kat Anutu mburaana. Tabe tomtom tire mi timoto kan.

⁶Muŋgu ni ikam tai ma iwe toono raraazaŋana, mi tumbundu bizin tindu ma tipa pa. Tana iti menmeen ti pini.

⁷Ni ko ikam peeze ma alok. Pa mburaana biibi kat. Mi ni mataana izzu pizin tomtom mi itirtiiri zin. Tana niom wal zorzooroŋoyom kamaŋga be kozoori mini pepe.

⁸Niom karkari ta boozomen, kapakur Anutu tiam pa kampeŋana kini. Kalŋoyom isala mi kiwit uruunu.

⁹Pa ni ta ikiskis ti ma tombot matanda yaryaara. Mi ni mataana piti, tana kumbundu ikam ŋgiris som.

¹⁰Ŋonoono, Anutu nu toombo yam pa pataŋana pakan bekena peŋgeeze urlaŋana tiam, kembei ta tinenne pat silba bekena you ikan ka muk ma ila ne, mi silba tana iwe ŋgeezeŋana kat.

¹¹Nu yok pa kilis ma ikam yam, mi ur pataŋana biibi isalakaala yam be ambaada.

¹²Mi zem koyam koi bizin ma tipadaaga yam. Tana niam kembei ampa la you leleene, mi kembei ta wo biibi isur yam. Tamen iŋgi ur leyam zaala kek. Tabe ambot ambai kat, mi amrao pa koroŋ ta boozomen.