Mboe 60:2-12

²Pa iŋgi kembei nu tok toono tiam ma imapalpaala, mi koroŋ ta boozomen ikamam be isaana. Tana amsuŋu be urpe toono tiam mini, kokena isaana kat.

³Wal ku ta niam i. Mi nu kam yam ma amre pataŋana biibi kat. Nu piwin yam pa yok mbolŋana ki ketem malmalŋana ku. Tabe ikam ma ampa na, kumbuyam mburaana som.

⁴Zin wal ta so timototo u mi tileŋleŋ la kalŋom na, twiiri ku itaŋ bekena tiko pa zaaba tabe ipet i.

⁵Anutu, leŋ suŋŋana tiam ti, mi swooro nomom woono ma uulu yam. Pa niam wal ku ta nu lelem piam ilip. Tana kamke yam pa pataŋana taiŋgi.

⁶Muŋgu Anutu imbot lele kini potomŋana, mi iso ta kembei: “Nio niŋ se paso, aŋporou ma aŋlip kek. Tana ko aŋpeete toono Sekem mi lele ŋgolooboŋana ki Sukot, mi aŋur ma iwe leyom leyom.

⁷Toono pakaana ki Gileat, ina nio tio. Mi toono kizin Manase tomini, ina nio tio men. Eparaim ta iwe kembei koroŋ ta ipakaala uteŋ. Mi lele pakaana ki Yudea, ina kembei tete ta iwe kilalan pa peeze ta aŋkamam na.

⁸Lele pakaana ki Moap iwe kembei timbiiri ta aŋwwe pa. Mi lele pakaana ki Edom, ina lele ta aŋpiri kumbuŋ keteene pa. Mi zin Pilistia kan na, nio aŋlip pizin kek, tana niŋ ise mi kalŋoŋ izalla.”

⁹Mi koozi na, asiŋ ta irao be ikam yo ma aŋlip pa koŋ koi bizin mi aŋlela kar kizin ta ka siiri mbolŋana na? Asiŋ ko imuuŋgu pio, mi iyaaru yo ma aŋla aŋpet lele pakaana kizin Edom?

¹⁰Asiŋ toro? Anutu, nu tau! Tamen iŋgi pizil ndemem piam, mi gabgaaba zin malmal kan tiam mini som.

¹¹Anutu, uulu yam be amlip pa koyam koi bizin. Pa ulaaŋa ta amkamam la kizin tomtom na, koroŋ sorok.

¹²Mi sombe Anutu igaaba yam, nako amlip. Pa ni irao be ikoto koyam koi bizin ma mburan imap.