Mboe 55:15-20

¹⁵Nio leleŋ be koŋ koi bizin swon imap karau men. Leleŋ be matan yaryaara mi tisula len Andewa. Pa lelen na, bok pa mbulu sananŋana, tana itu raama zin.

¹⁶Mi nio na, aŋboobo Anutu be iuulu yo. Mi Yooba ko ikamke yo.

¹⁷Aigule ta boozomen, aŋtaŋroro i mi aŋzzwe pataŋana tio ilala kini pa mankwoono, aigule, mi mbeŋ. Mi ni ileŋleŋ kalŋoŋ.

¹⁸Ŋonoono, koŋ koi bizin boozomen tizorzooro yo, mi tikamam malmal pio. Tamen Anutu ko itatke yo la naman ma aŋbot ambai.

¹⁹Ni ko ileŋ suŋŋana tio mi ikoto zin. Pa ta muŋgu mi imar na, ni imbotmbot se muriini peeze kana. Mi mbulu kini itortooro som. Tana wal ta so timototo i som, mi tizorzooro la kalŋaana, na ni kola ikoto zin.

²⁰Tomtom ta muŋgu igabgaaba yo na, ire sua kini mbukŋana kembei koroŋ sorok. Tanata isu ma itoori mini, mi ikamam malmal pa zin wal ta muŋgu ni ziŋan tiparluplup zin na.