Mboe 50:7-23

⁷“O niom wal tio Israel, keleŋ sua tabe aŋso i. Pa Anutu tiom ta nio i. Mi iŋgi be aŋswe mbulu tiom ta kakamam ŋoobo i.

⁸Patoronŋana ta kakamam pio na, nio aŋyaamba yom pa som. Mi mbili ta gorgori kenenne zin su kereŋ uunu na, ta kembena. Aŋyaamba yom pa som.

⁹Pa nio aŋkam kinkiini pa makau, som mekmek tiom ta timbot siiri tiom leleene na som.

¹⁰Buzur boozomen ta tiwwa su leleene na, nio tio men. Mi mbili ta timbot irao abal ta munŋaana men lwonlwon, ina tomini nio tio men.

¹¹Mi man boozomen ta tirie pa maŋaanaŋana na, nio ta aŋboro zin. Mi koroŋ boozomen ta tiwwa pa rie lene na, nio tio men.

¹²Nio sombe petel yo, na irao aŋwi yom pa koŋ kini sa na som. Pa toono ramaki ka koroŋ boozomen ta timbotmbot pa, ina koroŋ tio men.

¹³Parei, niom koso nio aŋkanan makau mazaana, som aŋwinin mekmek siŋiini? Som kat.

¹⁴Mi patoronŋana ta nio leleŋ be kakam pio, ina ta kembei: Leleyom ambai pio, kapakur yo pa kampeŋana tio, mi koto kat sua ta kumbuk pa Anutu tiom mbura keskeezeŋana na.

¹⁵Mi sombe pataŋana sa indeeŋe yom, na koboobo yo be aŋuulu yom. Naso aŋkamke yom, mi niom ko kapakur nio zoŋ.

¹⁶Mi zin wal sananŋan na, Anutu iso pizin ta kembei: “Tutu tio ta tibeede pataaŋa kek na, niom kawatwaata sorok paso? Mi parei ta kwoyom lala pa sua ta aŋbuk pa wal tio na?”

¹⁷Pa sua ta aŋso bekena aŋpazal yom pa na, kozorzooro. Mi kipizil ndemeyom pa tutu tio.

¹⁸Niom sombe kere tomtom kuumbuŋana sa, na leleyom ambai pini mi kagaabi. Mi zin wal ta tipasaana mbulu ki ula na, kagabgaaba zin ma niomŋan kawwa.

¹⁹Sua sananŋana mi sua pakaamŋana men ta iwedet pa kwoyom.

²⁰Mi kaŋgalŋgal sorok sua pizin wal tiom, mi kapasansaana toŋmatiziŋ tiom urun.

²¹Parei, iŋgi kakamam ta kembei mi kere nio aŋmanne men piom, tana koso nio aŋyok pa mbulu tiom tana? Niom koso nio raraate kembei ta niom? Som kat! Iŋgi be aŋyaamba yom mi aŋgal kat motoyom.

²²Tana niom ta kipizil ndemeyom pio na, kozo kakam kat ŋgar pa sua tio ti. Kere yom: Kokena aŋmaŋga mi aŋpasaana kat yom, mi leyom ulaaŋa sa som.

²³Tana leleyom ambai pio mi kapakur yo pa kampeŋana tio. Naso kakam patoronŋana ŋonoono tabe iwit nio zoŋ ma iwe biibi. Mi tomtom ta so ito zaala tio ndeeŋeŋana, nako aŋswe ulaaŋa tio pini, mi aŋkamke i ma imbot ambai.